00:00:00 IGIHE NETWORK KN KINYARWANDA EN ENGLISH FR FRANCAIS

Umurage wa Padiri Ubald umaze imyaka ibiri yitabye Imana

Yanditswe na Akayezu Jean de Dieu
Kuya 8 Mutarama 2023 saa 10:13
Yasuwe :

Imyaka ibiri irashize Padiri Ubald Rugirangoga wari uzwi mu bikorwa byo gusengera abarwayi, iby’isanamitima n’ubumwe n’ubwiyunge yitabye Imana.Yibutswe hagarukwa ku murage yasigiye ab’i Cyangugu n’Abanyarwanda muri rusange.

Padiri Ubald yitabye Imana ku wa 7 Mutarama 2021 nyuma y’igihe yari amaze arwariye COVID-19 muri Leta Zunze Ubumwe za Amerika. Urupfu rwe rwaturutse ku bibazo by’ubuzima yasigiwe n’iki cyorezo.

Ku Ibanga ry’Amahoro, ahubatse ikigo yashinze ngo abantu bajye bahagana bakire ibikomere, habereye umuhango wo kumwibuka ndetse n’ibikorwa by’amahoro byamuranze mu gihe cyose yamaze ku Isi.

Abitabiriye uyu muhango babwiye RBA ko umurage wo gusaba no gutanga imbabazi basigiwe na Padiri Ubald Rugirangoga utazibagirana, kandi ko imbuto zawo zizakomeza gushibuka.

Nyiramajyambere Valencie yagize ati "Ubundi Padiri Ubald uko byasa kose […] yego ntawe utegeka Imana ariko uko byasa kose azajya mu Bahire kuko ibitangaza yakoze kuri iri banga nta muntu wari kubikora ubaho."

Uwitwa Ngirimpuhwe Hyacinthe yagize ati "Ku giti cyanjye numvaga gutanga imbabazi biri kure, kuko numvaga abantu bose barakoze ubugome bw’indengakamere ariko adutoza inzira nziza, atwigisha gutanga imbabazi nk’umurage mwiza twasigiwe n’Umwami wacu Yezu Krisitu."

Biyemeje gukomeza umurage yabasigiye

Padiri Rugirangoga Ubald yamenyekanye cyane kubera ibikorwa by’isanamitima n’ibindi byiganjemo ibyo gusengera abarwayi bagakira. Yari amaze imyaka irenga 32 yarihaye Imana.

Mu mwaka wa 2015, Padiri Ubald yagizwe umurinzi w’igihango kubera uruhare yagize mu gutangiza gahunda y’Ubumwe n’Ubwiyunge muri Paruwasi ya Mushaka, ikaba yarabyaye imbuto nyinshi mu baturage ndetse inarenga imbibi igera no mu zindi.

Ni umurage abaturage b’i Rusizi na Nyamashake bavuga ko bazakomezanya ndetse bagaharanira ko ibikorwa bye by’isanamitima n’ubumwe n’ubwiyunge bizakomeza nk’uko yari yarabitangije.

Ngirente Philippe yagize ati "Ni umurage mwiza tugomba kubungabunga, ntuzazime kubera ko atakiriho."

Yakomeje agira ati "Ariko n’ubwo atakiriho ntabwo gahunda y’ubumwe n’ubwiyunge yahagaze ubu tugeze ku cyiciro cya 13 twigisha."

Umushumba wa Diyosezi ya Cyangugu, Musenyeri Sinayobye Edouard, yavuze ko butumwa bwe bwari bushingiye cyane ku isengesho ngo bwari bukubiye mu magambo arimo imbabazi no kubohoka.

Ati "Yavugaga kubohoka, yavugaga gusaba imbabazi, ukabona ashishikariye mu bikorwa bye byose, mu iyogezabutumwa, mu nama yagiraga abantu ko inzira y’ubumwe n’ubwiyunge ica mu gusaba imbabazi no kuzitanga."

Musenyeri Sinayobye avuga kandi ko ubutumwa bwa Padiri Ubald buzakomeza gusigasirwa haba muri Diyosezi ya Cyangugu yakoreragamo umurimo w’iyogezabutumwa ndetse no mu gihugu hose.

Ati "Padiri Ubald yari Umusaseridoti wa Diyosezi ya Cyangugu, ubutumwa bw’Umusaseridoti abusigira diyosezi, hano rero dusigasiye cyane uwo murage wose, turagerageza cyane gutuma ubutumwa bwe bwose bugenda neza."

Padiri Ubald yashyinguwe mu Karere ka Rusizi ahazwi nko ku Ibanga ry’Amahoro.

Centre Ibanga ry’Amahoro ni agasozi gaherereye mu Kagari ka Kamatita, Umurenge wa Gihundwe, Akarere ka Rusizi mu Burengerazuba.

Ni muri Diyosezi Gatolika ya Cyangugu, Paruwasi Nkanka, Santarari Muhari. Ni agasozi gafite ubuso busaga hegitari 25 ndetse hari ibikorwa yagizemo uruhare.

Ibikorwa byo gusengera abarwayi bagakira indwara zitandukanye zirimo ibyorezo n’izindi zabaga zarabaye akarande, Padiri Ubald ntabwo yabikoreraga mu Rwanda gusa kuko n’umunsi yandura Coronavirus ari nayo yaje kugeza ku rupfu rwe yari amaze iminsi muri Amerika mu bikorwa by’amasengesho.

Uretse muri Amerika, Padiri Ubald yatumirwaga henshi mu bihugu by’amahanga mu bikorwa byo gusengera abarwayi no kubibutsa ko abantu bose ari bene mugabo umwe bakwiye kubana mu mahoro n’urukundo.

Padiri Ubald umaze imyaka ibiri yitabye Imana yibutswe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .