Umuntu wa mbere ufite Coronavirus muri Afurika yagaragaye mu Misiri

Yanditswe na Habimana James
Kuya 15 Gashyantare 2020 saa 11:50
Yasuwe :
0 0

Minisiteri y’Ubuzima mu Misiri, yatangaje ko hari umurwayi ufite virusi ya coronavirus wagaragaye, akaba yabaye n’umuntu wa mbere ufite iyi ndwara ugaragaye kuri uyu mugabane.

Itangazo rya Minisiteri y’Ubuzima mu Misiri, rivuga ko uyu muturage atari Umunyamisiri nubwo batavuga ubwenegihugu bwe.

Umuvugizi wa Minisiteri y’Ubuzima, Khaled Megahed, yagize ati “Igihugu cyafashe ingamba zikomeye mu guhangana n’iki cyorezo kandi gikomeje kugenzura uyu murwayi, ubu ameze neza.”

Inzego z’ubutegetsi mu Misiri zivuga ko zamaze kubwira Ishami ry’Umuryango w’Abibumbye ry’Ubuzima, OMS iby’iki kibazo, kugeza ubu uyu murwayi akaba yashyizwe ahantu ha wenyine aho agomba kugenzurirwa no kuvurwa.

Umubare w’abamaze kwitaba Imana kubera iki cyorezo ni 1400, abamaze kwandura iyi virusi mu Bushinwa ni 63 932.

Kugeza ubu hari impungenge ku bucuruzi buri hagati ya Afurika n’u Bushinwa ko bushobora kugeza kuri uyu mugabane iki cyorezo, mu gihe hibazwa ku bushobozi bw’Abanyafurika mu guhangana n’iyi virusi.

Muri uku kwezi, Misiri yahagaritse ingendo z’indege zerekezaga mu Bushinwa, ndetse gicyura abaturage bacyo barenga 300.

Iyi ndwara yibasiye u Bushinwa ifata imyanya y’ubuhumekero igateza umusonga, yatumye ingendo zigana muri iki gihugu ndetse n’iz’imbere mu gihugu zihagarikwa, mu gihe inzego zinyuranye zikomeje gukora ibishoboka mu guhangana na cyo.

Imibare yerekana ko abamaze gukira iyi ndwara bagasezererwa mu bitaro ari 6723. Gusa inzego z’ubuzima zikomeje kuburira abantu bamaze gukira iyo ndwara ko hariho ibyago ko bakongera kwandura.

Ishami ry’Umuryango w’abibumbye ryita ku buzima, OMS, kuri uyu wa Kane ryatangaje ko Coronavirus itari kwiyongera cyane hanze y’u Bushinwa nubwo ikomeje kubwibasira, bigaragaza ko ingamba zafashwe zirimo gutanga umusaruro.

Ahugarijwe cyane hanze y’u Bushinwa ni mu Buyapani ahaheruka kugaragara ubwandu bushya 44, ku buryo abamaze kwandura ari 218. Kugeza ubu uburwayi bwa Coronavirus hanze y’u Bushinwa bumaze kugaragara mu bihugu 24.

Umuntu wa mbere muri Afurika yagaragaweho Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza