00:00:00 IGIHE NETWORK KN KINYARWANDA EN ENGLISH FR FRANCAIS

Umukandida ushakira ubukungu mu rumogi yasabye gushyigikirwa; Impinduka mu kwinjiza imodoka zakoze muri Uganda: Ay’ingenzi muri Afurika

Yanditswe na IGIHE
Kuya 30 June 2022 saa 09:50
Yasuwe :

Umukandida w’ishyaka ‘Roots’ mu matora ya Perezida muri Kenya, George Wajackoyah, yabwiye abaturage bo mu Mujyi wa Kisumu ko mu gihe yaba atsinze amatora cyangwa akegukanwa na Raila Odinga, yaba ari intsinzi ku Banyakenya bo mu Burengerazuba.

Ni bimwe mu byo yabwiye abamushyigikiye mu bikorwa byo kwiyamamaza yakoreye mu Mujyi wa Kisumu kuri uyu wa 29 Kamena 2022.

Yasabye abaturage kumushyigikira agatsinda amatora kandi ko atigeze arwanya Raila Odinga, umukandida w’ingenzi uharagarariye ako karere.

Ku bwe, intsinzi ye yaba ari urufunguzo rwo guteza imbere ubukungu bwa Kenya y’Uburengerazuba.

Ibikorwa bye byo kwiyamamaza byitabiriwe n’imbaga y’abantu biganjemo urubyiruko babanje kumushimagiza babyina indirimbo zo mu njyana ya ‘Reggae’.

Uyu mukandida yavuze ko natsinda amatora mu byo azakora harimo kwemeza ikoreshwa ry’urumogi mu mategeko ya Kenya.

Ibi ngo byazamura ubukungu bwa Kenya mu gihe abaturage baba bemerewe guhinga urumogi ku mpamvu zifite aho zihuriye n’ubuvuzi.

Ati “Tuzahinga urumogi turukoreshe mu kuziba icyuho cy’amadeni tugomba kwishyura u Bushinwa bwakoze imishinga y’ibikorwaremezo mu gihugu cyacu.”

Yavuze ko kandi natorwa azafungura abahamwe n’abakekwaho ibyaha bifitanye isano n’ikoreshwa ry’urumogi.

George Wajackoyah uri mu biyamamariza kuyobora Kenya yiyemeje kuzahura ubukungu bw'igihugu akoresheje ubuhinzi bw'urumogi

Uganda yisubiyeho ku cyemezo kireba iyinjizwa ry’imodoka zishaje

Uganda isa n’aho yisubiyeho ndetse yoroshya ingamba yari yashyizeho mu bijyanye n’imisoreshereze y’imodoka zirengeje imyaka icyenda mu gihe zigiye kwinjizwa mu gihugu, uhereye ku ya 1 Nyakanga 2022.

Iki cyemezo kizakoma mu nkokora Abanyakenya bari biteguye kubyaza inyungu ikumira ry’igurishwa ry’ibi binyabiziga.

Ikigo cy’Imisoro cya Uganda cyari cyatangaje muri Mata ko imodoka zishaje, ni ukuvuga izirengeje imyaka icyenda uhereye igihe zakorewe, zizajya zinjizwa mu gihugu binyuze muri gahunda y’imitangire y’imisoro ihuriweho mu bihugu bya EAC (Single Customs Territory (SCT) guhera ku itariki ya 1 Nyakanga 2022.

Hakurikijwe ubu butumwa, imodoka zagombaga kujya zisoreshwa zigeze ku cyambu aho zinjirira mu Muryango w’Ibihugu bya Afurika y’Iburasirazuba.

Ibi byazamuye icyizere cy’uko Abanyakenya bacuruza imodoka bazabyungukiramo kuko mbere bagerwagaho n’ingaruka z’uko hari imodoka zacuruzwaga mu buryo bwa magendu mu bihugu bituranyi.

Nyamara Ikigo cy’Imisoro cya Uganda cyakoze impinduka kuri ayo mabwiriza kivuga ko noneho areba imodoka zirengeje imyaka 13 zikozwe nk’uko The East African yabitangaje.

Uganda yisubiyeho ku cyemezo kireba iyinjizwa ry’imodoka zakoze

U Bushinwa bugiye gushyikiriza Zimbabwe inyubako y’Inteko Ishinga Amategeko

U Bushinwa bugiye gushyikiriza Zimbabwe inyubako y’Ibiro by’Inteko Ishinga Amategeko bwateye inkunga nyuma y’imyaka itatu n’igice imaze yubakwa.

Ibikorwa byo kuyubaka byatwaye agera kuri miliyoni 140 z’amadolari. Yubatswe n’abafundi 500 b’Abashinwa, bafashijwe n’abahereza 1200 bo muri Zimbabwe.

Iri ku buso bwa hegitari 3,3 ikaba ari impano y’u Bushinwa yatanzwe hagamijwe gushimangira umubano hagati y’ibihugu byombi.

U Bushinwa bumaze igihe bufatanya na Zimbabwe mu bikorwa bitandukanye. Bwateye ingabo mu bitugu iki gihugu mu nkundura yo kwigobotora ubutegetsi bw’abazungu mu gihe iki gihugu cyitwaga Rhodesia.

Ku rundi ruhande, u Bushinwa buvugwaho kwigarurira iki gihugu no gusahura umutungo kamere wacyo.

Zimbabwe igiye kwakira Ibiro by'Inteko Ishinga Amategeko yubakiwe n'u Bushinwa

Arabie Saudite: Kenya igiye kubaka inzu zizajya zicumbikira Abenegihugu bahohotewe

Guverinoma ya Kenya irateganya kubaka muri Arabie Saudite inzu zizajya zicumbikirwamo abimukira bakomoka muri iki gihugu mu gihe bahuye n’ihohoterwa.

Raporo z’abakozi b’Abanyakenya bafatwa nabi n’abakoresha babo muri Arabie Saudite zigaruka kenshi ndetse iryo hohoterwa bamwe ribaviramo urupfu.

Minisitiri w’Umurimo muri Kenya, Simon Chelugui, yabwiye itangazamakuru ku wa Kabiri ati “Tuzashyiraho inzu zizajya zakira abahuye n’ihohoterwa mu gihe tuzajya tuba turi mu myiteguro yo kubagarura mu gihugu nk’igisubizo cyo kurengera abantu bababarira mu mahanga, abenshi bakaba baboneka muri Arabie Saudite.”

Inkuru ya BBC ivuga ko Abanyakenya bagera ku 100 bakoreraga mu mahanga bapfuye mu myaka ibiri ishize.

Minisitiri Chelugui yavuze ko uwo mushinga washowemo agera kuri miliyoni 594 z’amadolari ya Amerika.

Abanyakenya bakorera kandi bagatura muri Arabie Saudite bariyongereye bava ku bihumbi 55 mu 2019 bagera ku bihumbi 97 uyu mwaka. Abenshi muri bo ni abakozi bo mu ngo nk’uko bitangazwa n’inzego z’ubuyobozi muri Kenya.

Guverinoma yatangaje ko igiye gukaza ibisabwa ibigo bishaka abakozi bigasabwa kwiyandikisha mu rwego rw’igihugu rushinzwe umurimo mbere yo kohereza Abanyakenya gukorera mu mahanga.

Minisitiri w’Umurimo muri Kenya, Simon Chelugui, yatangaje gahunda yo gutabara abenegihugu bahohoterwa muri Arabie Saudite

Mali irateganya amatora y’Umukuru w’Igihugu mu 2024

Inzego za gisirikare ziyoboye Mali, zatangaje ko amatora ya Perezida agamije gusubiza ubutegetsi mu maboko y’abasivile ateganyijwe muri Gashyantare 2024.

Itangazo ryagiye ahagaragara nyuma y’ingengabihe y’amavugurura ndetse amatora y’abagize Inteko Ishinga Amategeko n’aya Perezida yemejwe nyuma y’ibiganiro hagati ya guverinoma y’inzibacyuho n’abandi banyepolitiki, ku wa Kabiri.

Aya matora azakorwa mu byiciro bibiri mu myaka ibiri iri imbere.

Icyiciro cya mbere n’icya kabiri by’amatora y’abagize Inteko Ishinga Amategeko ateganyijwe mu Ukwakira na Ugushyingo 2023.

Amatora ya referendumu yo ateganyijwe muri Werurwe 2023 mbere y’uko ay’inzego z’ibanze aba muri Kamena 2023.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .