Umuhungu wa Perezida Denis Nguesso akurikiranywe n’u Bufaransa kunyereza no kwigizwaho imitungo

Yanditswe na IGIHE
Kuya 8 Gashyantare 2020 saa 12:58
Yasuwe :
0 0

Depite Denis Christel Sassou Nguesso, akaba n’umuhungu wa Perezida Denis Sassou Nguesso wa Repubulika ya Congo Brazzaville akurikiranywe n’inkiko z’u Bufaransa kunyereza no kwigwizaho imitungo atabasha gusobanura inkomoko yayo.

Iki kirego Denis Christel Sassou Nguesso uzwi ku izina rya KIKI, agikurikiranyweho n’umucamanza w’Umufaransa, Dominique Blanc, guhera mu Ukuboza 2019 nk’uko ikinyamakuru Challenge cyabitangaje.

Cyanditse ko iyo mitungo itimukanwa y’uyu muryango irimo inzu z’amacumbi na hoteli zifite agaciro ka miliyoni 30 z’amayero, Denis Christel Sassou Nguesso ashobora kuba yarabyubatse mu mutungo yanyereje w’Ikigo gicukura kikanacuruza Peteroli muri Congo Brazzaville.

Hari n’andi makuru avuga ko Denis Christel Sassou Nguesso w’imyaka 45, akaba n’umwe mu bakomeye muri icyo kigo gicukura kikanacuruza Peteroli (National Oil Company of Congo: SNPC), yagize uruhare mu kunyereza amayero miliyoni 50 mu isanduku ya Leta, akayifashisha mu bikorwa by’ibanga mu bihugu bitandukanye, yifashishije amasezerano ya baringa yavugaga ko yagiranye n’ikigo cyubaka ibikorwaremezo.

Umunyamategeko wa Repubulika ya Congo Brazzaville, Simone Bernard-Dupré, yamaganye ibyo birego umuhungu wa Perezida w’icyo gihugu akurikiranyweho, avuga ko hari imiryango yigenga ibyihishe inyuma.

Umunyamategeko w’Umuryango Mpuzamahanga urwanya n’Akarengane, William Bourdon, yavuze ko icyo kirego kigaragaza urwego ruhambaye Guverinoma y’icyo gihugu igezeho mu kunyereza umutungo na ruswa.

Iperereza ku kibazo cyo kunyereza umutungo muri iki gihugu rimaze igihe kuko ryagiye rikorwa no ku nshuti za hafi z’umuryango wa Perezida w’iki gihugu.

Mu 2017, Ubushinjacyaha bw’u Bufaransa bwatangiye guhata ibibazo umukobwa bwa Perezida Nguesso, Julienne Sassou Nguesso n’umugabo we na bishywa be batatu ku bikorwa byo kwigwizaho imitungo.

Ni iperereza ryatangijwe mu 2009 nyuma y’ikirego cyatanzwe na sosiyete eshatu, rinareba ku buryo imitungo umuryango wa Perezida wa Gabon Ali Bongo Ondimba yawugezeho n’abandi bakuru b’ibihugu bya Afurika.

U Bufaransa ni kimwe mu bihugu abayobozi b’ibihugu bya Afurika babikamo imitungo banyereje, cyane cyane abayobora ibihugu bwakolonije.

Denis Christel Sassou Nguesso akurikiranyweho kwigwizaho imitungo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .