00:00:00 IGIHE NETWORK KN KINYARWANDA EN ENGLISH FR FRANCAIS

Kenyatta yashinje Ruto gukwirakwiza ibihuha ashaka amajwi

Yanditswe na IGIHE
Kuya 27 July 2022 saa 03:07
Yasuwe :

Perezida wa Kenya, Uhuru Kenyatta yanenze Visi Perezida we, William Ruto, amushinja gukwirakwiza ibihuha ku ngingo ijyanye n’ibyambu ubwo yari mu bikorwa byo kwiyamamaza.

Uyu Mukuru w’Igihugu nubwo atatoboye avuge mu izina Visi Perezida we, yatangaje ko bidakwiye ko yitwikira politiki ya gahunda z’iterambere ry’ibyakozwe n’ubuyobozi bwa Jubilee.

Uwo yavugaga ni William Samoei Arap Ruto w’imyaka 55. Ubusanzwe ni Visi Perezida wa Kenya akaba umwe mu bakandida bahabwa amahirwe yo gutorerwa kuyobora iki gihugu.

Perezida Kenyatta yavuze ko William Ruto uhagarariye Ishyaka United Democratic Alliance (UDA) yakoresheje politiki y’amanyanga.

Yagize ati “Nta kintu kibi nka politiki yo kubeshya.’’

Mu mbwirwaruhame ye y’iminota 13, Perezida Kenyatta yashyigikiye iyubakwa ry’icyambu ndetse n’indi mishinga yakunze kunengwa na Visi Perezida we. Umukuru w’Igihugu yavuze ko iyubakwa ry’icyo cyambu [ICD] nta ngaruka rizagira ku byo muri Mombasa.

Ati “Nta muntu n’umwe wabuze akazi kubera iyubakwa ry’icyambu muri Naivasha ahubwo ishoramari ryakomeje gukura muri uyu mujyi uri ku nkombe z’amazi.’’

Yakomeje ati “Ari kubeshya Abanyakenya kandi ari muri iyi guverinoma, ubwo ni ubunyangamugayo?’’.

Perezida Uhuru Kenyatta yasabye abayobozi guhagarika gukoresha imvugo zidakwiye bashaka amajwi mu matora.

Mu minsi ishize, Raila Odinga yashinje William Ruto bahanganiye umwanya wo kuyobora Kenya kwiba amafaranga ya Leta no kuyakoresha aha abaturage ruswa mu bikorwa byo kwiyamamaza.

Aba bombi ni bo bakandida bahabwa amahirwe mu matora y’Umukuru w’Igihugu muri Kenya ateganyijwe ku wa 9 Kanama 2022.

Perezida Uhuru Kenyatta yashinje Visi Perezida we, William Ruto gukwirakwiza ibihuha ashaka amajwi mu matora y'Umukuru w'Igihugu ateganyijwe mu kwezi gutaha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .