Uganda yongereye iminsi 21 ku bihe bidasanzwe byo kwirinda Coronavirus

Yanditswe na IGIHE
Kuya 14 Mata 2020 saa 04:21
Yasuwe :
0 0

Perezida wa Uganda, Yoweri Kaguta Museveni, yatangaje ko igihugu cye cyongereyeho iminsi 21 ku bihe bidasanzwe mu rwego rwo guhagarika ikwirakwira ry’icyorezo cya COVID-19 giterwa n’agakoko gashya ka Coronavirus.

Ibi bihe bizatangira kubahirizwa ku wa Gatatu, tariki ya 15 Mata kugeza ku wa 5 Gicurasi 2020. Byatangajwe nyuma yaho iminsi 14 yari yatanzwe irangiriye.

Perezida Museveni yabigarutseho kuri uyu wa Kabiri ubwo yatangaza uko Uganda ihagaze mu kwirinda Coronavirus.

Yagize ati “Guverinoma yafashe umwanzuro wo kugumishaho icyemezo cyo kuguma mu rugo indi minsi 21 kuva ejo. Bigamije kudufasha kwiga neza iki kibazo. Ingamba zafashwe mbere zizakomeza kubahirizwa.’’

Yavuze ko kongera icyo gihe bizafasha abakora mu rwego rw’ubuvuzi kwiga neza uko ibintu bimeze no kugenzura abantu bagera hafi ku 18 000, bivugwa ko binjiye mu gihugu ku wa 7-22 Werurwe 2020.

Leta ya Uganda mu kwirinda ikwirakwira rya Coronavirus yafashe ingamba zirimo nko gufunga imipaka harimo n’Ikibuga Mpuzamahanga cy’Indege cya Entebbe ku ngendo z’abagenzi mu gihe ubwikorezi bw’imizigo n’inzira zo ku butaka bugikorwa.

Abashoferi b’amakamyo bakora ingendo zambukiranya ibihugu, baba aberekeza muri Uganda cyangwa abahahagaze ariko bakomeza ingendo, bazajya basuzumirwa ku mipaka.

Perezida Museveni yavuze ko nubwo abantu banduye Coronavirus ari 54 mu bagera ku 5664 bapimwe, hakiri kare kwemeza ko Uganda itarimo Coronavirus.

Mu bantu byemejwe ko banduye Coronavirus, abagera ku munani bamaze kuyikira.

Abantu 231 ni bo bari mu kato, abagera ku 1302 ni bo bikekwa ko bahuye n’abanduye mu gihe 573 byemejwe ko bahuye n’abanduye ndetse basoje iminsi 14 igenwa bari kwitabwaho.

Abapolisi basaba abantu kuva mu mihanda y'i Kampala, ku wa 26 Werurwe 2020, ubwo Perezida Yoweri Museveni yatangazaga ibihe byo kuguma mu rugo mu minsi 32 kuva ku wa 22 Werurwe 2020 mu kurwanya ikwirakwira rya Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .