Mu mpera z’icyumeru gishize nibwo Umuryango w’Abibumbye ndetse na Leta Zunze Ubumwe za Amerika, baburiye Uganda bayisaba kuryamira amajanja kuko ishobora kugabwaho igitero n’abagizi ba nabi.

Ambasade ya Amerika muri iki gihugu yatangaje ko ifite amakuru ko hari ibyago byinshi ko Kampala yagabwaho ibitero by’iterabwoba.

Yaburiye abaturage b’Abanyamerika bari yo kwirinda kujya mu bice rusange birimo amasoko, amashuri, insengero n’ahantu hakunze gusurwa n’abakerarugendo.

Polisi ya Uganda itangaza ko ayo makuru atari mashya kuri yo kandi ko ihora yiteguye ariko igasaba abaturage bayo kurushaho kuba maso.

Umuvugizi wa Polisi ya Uganda, ACP Kituuma Rusoke, yavuze ko “Ni byo koko hari iterambwoba gusa ryahozeho. Kuba Uganda iri ku isonga mu kurwanya iterambwoba ni ngombwa ko duhora twiteguye.”

Ati “Abantu bagomba guhora bari maso bitabaye ibyo bazagira ibibazo.”

Magingo aya igisirikare na igipolisi byahurije hamwe imbaraga mu bikorwa byo gucunga umutekano mu Mujyi wa Kampala. Ibice bimwe na bimwe byari bisanzwe bicungirwa umutekano n’ibigo by’igenga ubu biri kugenzurwa n’izi nzego ziri no kwifashisha imbwa zisaka.

Umuvugizi w’Igisirikare cya Uganda, Brig. Gen. Felix Kulayigye, yabwiye itangazamakuru ko ibi bitero bivugwa na Amerika ari ibishobora kugabwa n’Umutwe w’iterabwoba wa Al Shabaab.

Yasabye abaturage ba Uganda kutagira ubwoba kuko ari byo umwanzi ashaka, abasaba gukomeza gufatanya n’inzego z’umutekano.

Brig. Gen. Felix Kulayigye, yavuze ko uyu muburo utazatuma ibikorwa bya buri munsi muri Kampala bihagarara cyangwa ngo hagire ibifungwa.

Uganda ntitewe ubwoba n’ibitero bishobora kuyigabwaho n’Umutwe wa Al Shabaab