Uganda yari yemeye guha ubuhungiro Bashir mbere y’uko yeguzwa

Yanditswe na HABIMANA James
Kuya 17 Mata 2019 saa 08:53
Yasuwe :
0 0

Leta ya Uganda yatangaje ko yari yiteguye guha ubuhungiro Omar al-Bashir wahiritswe ku butegetsi muri Sudani nyuma y’imyigaragambyo yamaze amezi agera kuri atatu.

Umunyamabanga wa Leta muri Minisiteri y’Ububanyi n’Amahanga ya Uganda, Henry Okello Oryem, yabwiye abanyamakuru ko “iyo Bashir asaba ubuhungiro muri Uganda, byagombaga kwemerwa na Perezida Museveni kuko n’ubu agifatwa nka Perezida nubwo yavanwe ku butegetsi n’abasirikare.”

Okello yakomeje agira ati “Bashir ni we washyizeho amasezerano y’amahoro muri Sudani y’Epfo, yagize kandi uruhare rukomeye mu gihugu cye bituma kugeza uyu munsi tumushimira, kwaka ubuhungiro muri Uganda ni ikintu twagombaga kwemera.”

The East African dukesha iyi nkuru yavuze ko nubwo Museveni na Bashir bigeze kugirana ibihe bibi mu gihe cy’ubutegetsi bwabo, ariko ubu byari bitakiriho.

Tariki 11 Werurwe nibwo Minisitiri w’Ingabo wa Sudani, Awad Ibn Houf yemeje ihirikwa ku butegetsi ryakorewe Bashir ndetse ko yahise atabwa muri yombi akaba ari ahantu harindiwe umutekano.

Yahise anatangaza ibihe bidasanzwe by’amezi atatu, anahumuriza abanyagihugu bamaze igihe mu myigaragambyo ko hazashyirwaho akanama ka gisirikare kazakurikirana ihererekanyabubasha mu gihe k’imyaka ibiri.

Houf yatangaje kandi ko Itegeko Nshinga rya 2005 ryahaga ububasha Bashir kuzakomeza gutegeka rizaseswa. Kugeza ubu, Igisirikare kiri kotswa igitutu n’impande zinyuranye zisaba ko ubutegetsi bushyirwa mu maboko y’Abasivili.

Omar al-Bashir yari amaze imyaka 30 ku butegetsi yafashe mu 1989 na bwo nyuma y’intambara yamenetsemo amaraso menshi.

Kugeza ubu Urukiko Mpuzamahanga Mpanabyaha ICC, rwamushyiriyeho impapuro zo kumuta muri yombi ashinjwa ibyaha by’intambara n’ibyibasiye inyokomuntu, gusa abamuhiritse ku butegetsi bo bavuze ko atazaburanishirizwa hanze y’igihugu, inkiko zo mu gihugu cye ngo nizo zizamuburanisha.

Uganda yatangaje ko Perezida Museveni yari yiteguye guha ubuhungiro Bashir wayoboraga Sudani

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza