00:00:00 IGIHE NETWORK KN KINYARWANDA EN ENGLISH FR FRANCAIS

Uganda yanenzwe gushora miliyoni 30$ mu kugura imodoka z’Abadepite aho kuba inkingo za Covid-19

Yanditswe na Zigiranyirazo Bajecteur
Kuya 24 Nyakanga 2021 saa 08:35
Yasuwe :
0 0

Uganda yanenzwe gushora akayabo mu kugura imodoka z’abagize Inteko Ishinga Amategeko aho nibura buri umwe yagenewe miliyoni 200 z’amashilingi, mu gihe igihugu kiri mu bihe bikomeye byatewe na Covid-19 kikaba kitanafite inkingo.

Umuvugizi w’Inteko Ishinga Amategeko muri Uganda, Chris Obore, yabwiye Reuters ko aya mafaranga yatanzwe muri iki Cyumweru ndetse buri mudepite akagenerwa 56.500 $, asaga miliyoni 56 Frw. Muri rusange, imodoka z’abadepite zizagurwa miliyoni 30 $

Yavuze ko abagize Inteko Ishinga Amategeko bagomba gukora kandi ko guhabwa imodoka ari kimwe mu biborohereza akazi kabo.

Ati “Bakeneye gukurikirana uko ibintu bikorwa mu duce bashinzwe, none nibaba badafite imodoka bazabikora bate?”

Kuva mu mpera za Gicurasi, Uganda yugarijwe n’icyorezo cya Covid-19 aho virus yihinduranyije yo mu bwoko bwa Delta yatumye ibitaro byuzura, ibikoresho birimo udupfukamunwa, umwuka wongererwa abarwayi n’ibitanda bikabura.

Abanduye Covid-19 bamaze kurenga ibihumbi 92 naho 2.483 bishwe n’iki cyorezo.

Umunyamabanga Mukuru w’Ishyirahamwe ry’abaganga muri Uganda, Mukuzi Muhereza, yavuze ko ayo mafaranga yahawe Abadepite yakabaye akoreshwa ibindi byafasha igihugu gusubira mu buzima busanzwe.

Ati “Tubona leta yihutira gukemura ibibazo by’abanyepolitiki ariko ntiyihutire gutanga amafaranga yo gufasha indembe zikeneye ubuvuzi.”

Inkingo zigera kuri miliyoni imwe ni zo zimaze gutangwa muri Uganda, mu gihe abakeneye gukingirwa barenga miliyoni 41.

Sosiyete Sivile n’abatavuga rumwe n’ubutegetsi muri Uganda banenze leta ko isesagura amafaranga mu bintu bitihutirwa.

Abagize Inteko Ishinga Amategeko muri Uganda bagiye kugurirwa imodoka z'akataraboneka

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .