00:00:00 IGIHE NETWORK KN KINYARWANDA EN ENGLISH FR FRANCAIS

Uganda yahakanye ibyo kwirukana abayobozi ba Uganda Airlines, ngo bahawe akaruhuko kugira ngo abandi bige kuyobora

Yanditswe na IGIHE
Kuya 2 Gicurasi 2021 saa 01:41
Yasuwe :
0 0

Minisitiri w’umurimo n’Ubwikorezi muri Uganda, Gen Edward Katumba Wamala yateye utwatsi amakuru yavugaga ko hari abayobozi bakuru ba sosiyete y’iki gihugu ikora ingendo zo mu kirere, Uganda Airlines bahagaritswe kubera imicungire mibi.

Amakuru y’uko hari abayobozi bakomeye muri Uganda Airlines bahagaritswe yatangiye gucicikana ku wa 1 Gicurasi 2020.

Ikinyamakuru cyo muri iki gihugu, Saturday Monitor cyatangaje ko amakuru yizewe ari uko abahagaritswe bagera ku 10 barimo abayobozi bakuru n’abagize Inama y’Ubutegetsi ya Uganda Airlines.

Mu bavugwaga ko bahagaritswe harimo Umuyobozi Mukuru, Cornwell Muleya, n’abagize inama y’ubutegetsi barimo Perez Ahebwa, Benon Kajuna, Godfrey Ssemugooma, Catherine Asinde Poran, Rehema Mutazindwa, Charles Hamya na Stephen Aziku Zua.

Iki kinyamakuru cyangaje ko umwanzuro wo guhagarika aba bayobozi wafashwe ku wa 28 Mata nyuma y’inama bari bagiranye na Minisitiri Edward Katumba Wamala.

Minisitiri Edward Katumba Wamala ngo yavuze ko bagomba guhagarikwa nibura amezi atatu kugira ngo hakorwe iperereza ku bibazo by’imicungire mibi iri muri Uganda Airlines ituma ikomeza guhomba.

Nyuma y’uko ibinyamakuru byanditse iby’iyi nkuru y’ihagarikwa ry’aba bayobozi, Minisitiri Edward Katumba Wamala abinyujije kuri Twitter yavuze ko batigeze birukana aba bayobozi ba Uganda Airlines ko ahubwo babasabye gufata ikiruhuko kugira ngo n’abo bakorana bige kuyobora.

Ati “Nashakaga gusobanura neza ibyavuzwe bijyanye n’iyirukanwa ry’abayobozi bakuru ba Uganda Airlines, kubera imikorere mibi yatewe na COVID-19 no kuba tutaratangira gukora ingendo ndende. Abayobozi bakuru basabwe gufata ikiruhuko, ibi byakozwe kugira ngo hatozwe ndetse hanageragezwe ababungirije, kugira ngo twizere ibyiza. Mureke abayobozi bo hejuru baruhuke mu gihe twitegura gukora ingendo ndende.”

“Kujya mu kiruhuko ari benshi ku ruhande rumwe bizagira ingaruka kuri sosiyete, ariko mureke turekere gukeka dushyigikire Uganda Airlines.”

Raporo y’Umugenzuzi w’Imari ya Leta muri Uganda igaragaza ko mu mwaka wa 2018/2019 Uganda Airlines yahombye miliyari 4,197Frw, nde mu 2019/2020 ibi bihombo birazamuka bigera kuri miliyari 28,544Frw.

Uretse ibi bihombi iyi raporo igaragaza ko mu 2019/2020 Uganda Airlines itabashije kwinjiza miliyari 93,347 Frw nk’uko yari yabyiyemeje ahubwo ikinjiza miliyari 9,958 Frw. Ikindi kibazo cyagaragaye ni uko amafaranga iki kigo cyakoresheje mu mwaka ushize yarenze kure ayari ateganyijwe.

Minisitiri w’umurimo n’Ubwikorezi muri Uganda, Gen Edward Katumba Wamala (iburyo) yahakanye ibyo kwirukana abayobozi ba Uganda Airlines barimo n'umuyobozi mukuru,Cornwell Muleya (ibumoso) avuga ko ahubwo basabwe gufata ikiruhuko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .