Uganda: Imyigaragambyo yakajije umurego, 28 bamaze kuyigwamo ( Video)

Yanditswe na IGIHE
Kuya 20 Ugushyingo 2020 saa 02:23
Yasuwe :
0 0

Umubare w’abaturage bagwa mu myigaragambyo yo gusaba ko Robert Kyagulanyi uzwi nka Bobi Wine uri mu bahatanira kuyobora Uganda afungurwa ukomeje kwiyongera umusubirizo.

Mu gitondo cyo kuri uyu wa 20 Ugushyingo, umubare w’abamaze kugwa muri iyi myigaragambyo wari 19, gusa kuri ubu Polisi yatangaje ko bamaze kugera kuri 28.

Mu kiganiro Umuvugizi wa Polisi ya Uganda yagiranye n’abanyamakuru bo muri iki gihugu yavuze ko abagera kuri 577 bamaze gutabwa muri yombi kubera ibikorwa by’urugomo biri kubera muri iyi myigaragambyo.

Kyagulanyi yafashwe ku wa Gatatu asanzwe mu Karere ka Luuka aho yari ari mu bikorwa byo kwiyamamaza. Ashinjwa gukoranya abantu benshi barenze ku mabwiriza yo kwirinda icyorezo cya COVID-19.

Iri fatwa ry’uyu mugabo utavuga rumwe n’ubutegetsi bwa Perezida Museveni, ryakuruye imyigaragambyo, kugeza magingo aya imaze igenda irushaho gufata indi sura.

Ku wa 19 Ugushyingo umugore wa Robert Kyagulanyi, Barbara Itungo, yabwiye BBC ko kuva umugabo we yatabwa muri yombi polisi yamwangiye kugira uwo mu muryango we cyangwa umunyamategeko babonana.

Ikinyamakuru Daily Monitor cyatangaje Robert Kyagulanyi yanze gusinya inyandiko zari kumwemerera kurekurwa atanze ingwate.

Ahubwo ngo yavuze ko hakenewe ibintu bibiri, ko agezwa imbere y’urukiko akamenyeshwa ibyo aregwa cyangwa akarekurwa ntihagire ikintu yongera kubazwa.

Nyuma y’ifungwa rya Bobi Wine n’umukandida Patrick Amuriat uhagarariye ishyaka FDC mu matora (we yaje kurekurwa), abakandida bane barimo Gen Maj Mugisha Muntu wa Alliance for National Transformation, umukandida wigenga John Katumba, Lt Gen Henry Tumukunde uhagarariye Renewed Uganda na Norbert Mao uhagarariye Democratic Party (DP) mu matora ya perezida, babaye bahagaritse ibikorwa byo kwiyamamaza, mu kwifatanya na bagenzi babo.

Uyu mubyeyi yari ari kuririra umwana we wiciwe muri iyi myigarambyo. Hari mbere y’uko ajya kumushyingura
Abashyigikiye Bobi Wine bakomeje gusaba ko arekurwa
Abigaragambya batwika amapine bagafunga imihanda
Buri wese iyo polisi ije agerageza gutabara ubuzima bwe
Iyi myigaragambyo yatewe n'itabwa muri yombi rya Bobi Wine

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .