Uganda: Icyorezo cya Fièvre Jaune kimaze guhitana abantu batatu

Yanditswe na IGIHE
Kuya 24 Mutarama 2020 saa 12:22
Yasuwe :
0 0

Minisiteri y’Ubuzima muri Uganda yemeje ko abantu batatu bamaze guhitanwa n’indwara ya Fièvre Jaune, ku buryo iki gihugu kigiye gutangiza gahunda y’ikingira ry’iyi ndwara ikwirakwizwa n’imibu.

Mu itangazo ryashyizwe ahagaragara na Minisitiri w’Ubuzima wa Uganda, Aceng Jane Ruth kuri uyu wa Gatanu, yavuze ko icyo cyorezo cyagaragaye mu karere ka Moyo mu gace ka West Nile no mu karere ka Buliisa mu gace ka Hoima.

Abantu babiri barimo uw’imyaka 18 n’undi wa 21 bo mu karere ka Moyo ni bo babanje gufatwa, bavuye muri Sudani y’Epfo. Bajyanwe mu bitaro ku wa 3 Mutarama 2020 bagaragaza ibimenyetso by’umuriro mwinshi, kuruka, umunaniro ukabije, kuribwa umutwe, mu nda no kuva amaraso menshi. Bombi baje gupfa, ibimenyetso biza kwerekana ko bazize Fièvre Jaune.

Mu karere ka Buliisa naho abantu babiri byemejwe ko banduye iyo ndwara, barimo umugabo w’imyaka 37 n’umugore we w’imyaka 38.

Umugabo ngo yacuruzaga amata hagati ya Uganda na Repubulika ya Demokarasi ya Congo, yagiye ku bitaro ku wa 31 Ukwakira 2019 na we afite ibimenyetso bya Fièvre Jaune, apfa ku itariki 4 Ugushyingo 2019. Mu iperereza byaje kugaragara ko umugore we nawe yayanduye, ari ko we aracyari muzima.

Uganda yatangaje ko kuba iyi ndwara imaze kugaragara ku bantnu bane, hagiye gutangira ikingira ry’iki cyorezo mu turere twa Moyo na Buliisa.

Minisitiri Aceng yavuze ko bitewe n’uko iyi ndwara ikwirakwizwa n’umubu “abaturage bose bakangurirwa kurara mu nzitiramubu. Igihe hikanzwe ibimenyetso byayo, ni ngombwa guhita bimenyeshwa ivuriro riri hafi.”

Ibimenyetso bya Fièvre Jaune bitangira kugaragara hagati y’iminsi 3-6 nyuma yo kurumwa n’umubu ufite iyo virusi. Ibyo bimenyetso ni ukugira umuriro, gusesa urumeza ku mubiri, kubabara umutwe no mu ngingo no kugira amaso y’umuhondo.

Mu gihe indwara itavuwe hakiri kare hashobora kuzana ibimenyetso bikaze nko kuva amaraso ahari umwenge hose ku mubiri, kuruka ndetse no kugwa muri koma. Nibura 80% by’abarwayi bageze muri urwo rwego barapfa.

Udukoko dutera iyi ndwara dukwirakwiza n’imibu. Iyo umubu wo mu bwoko bwa ‘Aedes aegypti’ urumye umuntu urwaye iyi ndwara, umuvomamo udukoko tuyitera, hanyuma ukaba ushobora kwanduza abantu batarwaye mu gihe ubarumye nabo.

Kwirinda iyi ndwara bisaba mbere na mbere kurwanya imibu ikwirakwiza udukoko tuyitera. Yirindwa hakorwa isuku, ibinogo n’ibindi bintu byose bishobora kurekamo amazi hafi y’ingo igihe kirekire bigakurwaho kuko bituma iyo mibu ibasha kororoka.

Abakora ingendo zijya mu ibihugu bigaragaramo iyo ndwara basabwa kwikingiza nibura habura iminsi icumi ngo bakore urugendo, mu Rwanda urukingo rwayo rukaba ruboneka i Gikondo ahakorera ikigo cy’igihugu gishinzwe gahunda yo gukingira.

Indwara ya Fièvre Jaune igira ibimeyetso birimo kugira amaso y'umuhondo no kuribwa umutwe no mu nda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza