Abajenerali bakoze iyi mpanuka ni Lt Gen James Nakibus Lakara uyobora ikigo gishinzwe ubwikorezi bw’imizigo mu kirere, Lt Gen (Rtd) Andrew Gutti wayoboye Urukiko Rukuru rwa Gisirikare na Brig Gen Mwanje Ssekiranda uyobora Umutwe w’Inkeragutabara.

Ikinyamakuru New Vision, kuri uyu wa 23 Ugushyingo 2024, cyatangaje ko iyi mpanuka yabaye ku wa Kane ubwo imodoka aba bayobozi barimo zagongwaga n’ikamyo yari yacitse feri, ubwo bari bageze mu gace ka Namunsaala mu muhanda wa Kampala-Gulu.

Umuvugizi wa Polisi ya Uganda mu gice cya Savannah, Sam Twineamazima, yatangaje ko aba basirikare na Minisitiri Mulimba bajyanwe mu bitaro bya Bombo kugira ngo bitabweho n’abaganga.

Yagize ati “Abakoze impanuka bihutishirijwe ku bitaro bya gisirikare bya Bombo kugira ngo bavurwe. Amakuru yakusanyijwe n’abofisiye bashinzwe iperereza ry’ahakorewe icyaha kugira ngo yifashishwe mu iperereza.”

Tariki ya 16 Ukwakira 2024, umuhanda wa Kampala-Gulu na bwo wabereyemo impanuka ya Fuso na ‘taxi’, yapfiriyemo abantu batandatu, abandi batanu barakomereka.

Imodoka zari zitwaye abajenerali batatu zagonzwe

Imwe mu modoka zagonzwe n'iyi kamyo yangiritse bikabije