Uduce dutandatu tubumbatiye umurage w’Isi twatangiye kwangizwa n’imihindagurikire y’ibihe

Yanditswe na Mukahirwa Diane
Kuya 24 Nzeri 2020 saa 06:05
Yasuwe :
0 0

Hashize myaka ibihumbi, abantu hirya no hino ku Isi bakorera ubukerarugendo mu duce dutandukanye, harimo n’utwashyizwe mu murage w’Isi. Gusa kuri ubu tumwe muri utwo duce dufatiye runini amateka y’Isi turagenda dukendera, kandi bigizwemo uruhare n’imihindagurikire y’ikirere.

Ubushakashatsi bwakozwe n’amatsinda yo mu gihugu cy’u Bwongereza, Kenya na Leta Zunze Ubumwe za Amerika, bwagaragaje ko hari uduce dutandukanye tugera muri dutandatu, turi mu byago bikomeye byo kwangizwa n’imihindagurikire y’ikirere.

Nk’agace ka Suakin ko mu Majyaruguru ya Sudan, kari mu duce ndangamurage tw’Ishami ry’Umuryango w’Abibumbye ryita ku burezi, ubumenyi n’umuco, UNESCO, kamaze kwangizwa cyane n’amazi y’umwuzure w’umugezi wa Nil.

Nyamara aka gace gafite amateka akomeye arimo ko kuva mu myaka irenga 3 000 ishize, hakorerwaga ubucuruzi buhambaye bw’Abanyamisiri, banahashyize icyambu kinini ndetse banahashyira inzu n’imisigiti bigaragaza uburyo hahoze hatuwe.

Joanne Clarke, umwe mu bashakashatsi bapima ikigero cy’ingano n’umuvuduko w’ ihindagurika ry’ikirere, yagaragaje ko ikibazo cy’iyangirika ry’ikirere ari cyo ntandaro nyakuri y’iyangirika ry’utu duce, ndetse bigenze nabi, mu myaka iri imbere dushobora kuzazimira.

Yagize ati “Turabizi ko inyanja Itukura izibasirwa n’ ingaruka z’imihindagurikire y’ikirere mu myaka icumi iri imbere, niba rero hatagizwe igikorwa, ibi bibazo bizarushaho kuba bibi mu myaka iri imbere.”

Akandi gace kari mu bibazo byo kwangirika ni Lamu ko muri Kenya. Aka gace kashyizwe mu mutungo ndangamurage w’Isi kubera uburyo katuwe kera cyane, mu myaka irenga 700 ishize. Ni agace kandi kabumbatiye amateka akomeye y’ururimi rw’Igiswahili n’idini ya Islam muri Afurika y’Iburasirazuba.

Hariho kandi ikirwa cya Comoros, agace ka Madina, agace ka Twyfelfontein ko muri Namibia ndetse na Djenné, umujyi wo muri Mali, watangiye guturwa muri 250 mbere y’ivuka rya Yezu. Ibi bice byose birimo kwangirika kandi biri mu bice ndangamurage bya UNESCO.

Abahanga bagira inama ibihugu bifite uduce dushobora kurengerwa n’amazi gukora ibishoboka byose bikaturinda, byifashishije uburyo bwo kurinda imyuzure busanzwe bukoreshwa mu bihugu nka Misiri.

Ihindagurika ry'ikirere ni kimwe mu biteza imyuzure myinshi ku Isi, rikangiza bimwe mu bice ndangamurage biri hafi y'ahibasirwa n'iyo myuzure

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .