Ubwoko bushya bwa Coronavirus yandura vuba bwageze muri Kenya

Yanditswe na Dufitumukiza Salathiel
Kuya 22 Mutarama 2021 saa 08:57
Yasuwe :
0 0

Minisiteri y’Ubuzima muri Kenya yatangaje ko hari abantu babiri bagaragaweho ubwoko bushya bwa Coronavirus busa nk’ubwagaragaye mu gihugu cya Afurika y’Epfo na Nigeria.

Ni ubwoko buteye ubwoba kuko bwandura vuba ku kigero cya 70% ugereranyije n’ubusanzwe, bikaba biteye impungenge kuko mu gihe bwaramuka bukwirakwiriye muri Afurika, bushobora gukoma mu nkokora uyu mugabane ubusanzwe utari warazahajwe cyane na Coronavirus ugereranyije n’indi migabane.

Iyo Minisiteri yabwiye itangazamakuru ko “Ibi byagaragaye kubera uburyo bwacu bw’isuzuma bwakajijwe,” ndetse abo bagabo bakaba basubijwe mu gihugu cyabo, gusa iyi Minisiteri yirinze gutangaza imyirondoro y’abo bagabo n’aho bari bakomotse, icyakora ngo babakira bose nta bimenyetso bagaragazaga.

Ibihugu 60 bimaze kugaragaramo ubu bwoko bushya bw’iki cyorezo, icyakora ntiburatangira gukwirakwira ku Mugabane wa Afurika nk’uko bimeze ku yindi migabane, aho nko mu gihugu cy’u Bwongereza bwatangiriye, hanashyizweho gahunda ya Guma mu Rugo mu rwego rwo kubwirinda.

Hagati, abaganga bavuga ko usibye kuba ubu bwoko bwa Coronavirus bwandura vuba, ariko inkingo zizabukiza nk’uko ubwari busanzwe bimeze, nyuma y’uko hari abari bagaragaje impungenge z’uko inkingo zitazabasha guhangana n’ubu bwoko bushya.

Inzego z’Ubuzima ku Mugabane wa Afurika ziburira ibihugu by’uyu mugabane kutirara, kuko urugendo rwo guhangana n’iki cyorezo rugeze mu mahina.

Ubwoko bushya bwa Coronavirus bwageze mu Karere u Rwanda ruherereyemo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .