Ubushinjacyaha bwajuririye umwanzuro wo kugira umwere Laurent Gbagbo wayoboye Côte d’Ivoire

Yanditswe na Bukuru JC
Kuya 16 Nzeri 2019 saa 05:24
Yasuwe :
0 0

Ubushinjacyaha mu Rukiko Mpuzamahanga Mpanabyaha (ICC) rukorera mu Buholandi, bwajuririye umwanzuro uru rukiko ruheruka gufata wo kugira umwere Laurent Gbagbo wahoze ari perezida wa Côte d’Ivoire na Charles Blé Goudé wahoze ayoboye urubyiruko rw’ishyaka Front Populaire Ivoirien rya Gbagbo.

Abo bombi urukiko rwanzuye ko barekurwa ku wa 15 Mutarama, ariko kuri uyu wa Mbere Ubushinjacyaha bwajuririye icyo cyemezo bikozwe n’Umushinjacyaha Mukuru w’urwo rukiko, Fatou Bensouda.

ICC yaherukaga kwanzura ko Laurent Gbagbo wahoze ayobora Côte d’Ivoire arekurwa kubera ko Ubushinjacyaha bwananiwe gutanga ibimenyetso bihagije bimushinja. Gbagbo yari amaze imyaka irindwi muri gereza z’urwo rukiko mu Buholandi ku byaha byibasiye inyokomuntu.

Gbagbo ashinjwa uruhare mu rupfu rw’abasaga 3000 baguye mu mvururu zakurikiye amatora yo mu 2010. Yarangiye ibyayavuyemo bigaragaje ko Gbagbo yatsinzwe na Alassane Ouattara uyoboye igihugu kuri ubu.

Gbagbo w’imyaka 73 yanze kwemera ibyavuye muri ayo matora kugeza ubwo habaye imyigaragambyo yanamukuye ku butegetsi nabi.

Gbagbo yemerewe gufungurwa asanga mugore we Simone Gbagbo warekuwe muri Kanama umwaka ushize n’urukiko rwo muri Côte d’Ivoire nyuma y’imyaka irindwi afunzwe. Yarekuwe ku mbabazi za Perezida Ouattara.

Umwanzuro w’irekurwa rya Gbagbo wateje imyigaragambyo y’abaturage bavugaga ko nta butabera abagizweho ingaruka n’ibikorwa bye bizeye naramuka afunguwe.

Ubushinjacyaha bwajuririye umwanzuro wo kugira umwere Laurent Gbagbo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza