00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwibukije Loni ko ubushotoranyi bwa RDC budakwiye kurenzwa ingohe

Yanditswe na IGIHE
Kuya 13 June 2022 saa 04:59
Yasuwe :

Umuvugizi wa Guverinoma y’u Rwanda, Yolande Makolo, yibukije Umuryango w’Abibumbye ko ibihugu byose bigira ubusugire bungana, ashimangira ko ubushotoranyi bwa Repubulika Iharanira Demokarasi ya Congo (RDC) bukwiye guhagarara burundu.

Makolo yasubizaga imvugo y’Umuvugizi w’Umunyamabanga Mukuru w’Umuryango w’Abibumbye, Stephane Dujarric, ku bibera muri Repubulika Iharanira Demokarasi ya Congo (RDC), wagaragaje ko iki gihugu gishotorwa kandi kivogerwa. Muri make yakigaragaje nk’igihohoterwa gusa.

Dujarric yagize ati "Turongera gushimangira ko dushishikajwe n’ubusugire, ubwigenge, ubumwe ndetse n’ukutavogerwa kwa RDC kandi turamagana ibihugu byihisha inyuma y’imitwe yitwaje intwaro".

U Rwanda rwahise rwibutsa ko bitari bikwiye gukomoza kuri RDC gusa ngo hirengagizwe ubushotoranyi ikomeje kurukorera. Ingabo z’iki gihugu zimaze gutera ibisasu ku butaka bw’u Rwanda inshuro nyinshi.

Ku wa 19 Werurwe no ku wa 23 Gicurasi 2022 mu mirenge ya Kinigi na Nyange muri Musanze n’uwa Gahunga muri Burera ibisasu bya FARDC byakomerekeje abantu byangiza n’imitungo yabo.

Hari kandi gushimuta abasirikare b’u Rwanda babiri bari ku burinzi byakozwe na FARDC ifatanyije na FDLR, ibi bikaba byaramenyeshejwe Guverinoma ya RDC, itsinda rishinzwe kugenzura uko imbibi z’imipaka zubahirizwa, EJVM n’abandi.

Makolo yibukije Dujarric ko "Ubusugire bw’ibihugu byose burangana yaba ubw’u Rwanda cyangwa ubwa RDC. Ubwo RDC yateraga ibisasu ku butaka bw’u Rwanda ntiyari yashotowe, iki ni ikibazo gikomeye gifite ingaruka kandi kigomba guhagarara burundu".

Yakomoje kandi ku bufatanye bwa Monusco n’ingabo za FARDC ziyunze na FDLR n’indi mitwe, anenga kuba izi ngabo z’Umuryango w’Abibumbye zimaze imyaka irenga 20 muri RDC, zirebera ubu bufatanye bugamije kugera hafi y’u Rwanda ngo ruhungabanyirizwe umutekano.

U Rwanda ruherutse gutangaza ko FARDC yivanze na FDLR ku buryo wagira ngo ni igisirikare kimwe, bakora inama bagahuza gahunda y’ibyo bagiye gukora noneho MONUSCO na yo ikaza ngo ije gushyigikira FARDC.

Mu nshingano za MONUSCO harimo kurwanya imitwe yitwaje intwaro yose ariko yo ngo yahisemo kurwanya M23 yonyine, ifatanyije n’ingabo za RDC.

Loni kandi yamaganye amagambo y’urwango akomeje gukwirakwizwa, agamije kwangisha bamwe mu bantu bigendanye no kubura imirwano kwa M23.

Makolo yashimye ko kera kabaye Umuryango w’Abibumbye uzirikana ko FDLR iri muri RDC kandi ihakorera ibikorwa bitandukanye ndetse ukaba wamaganye amagambo y’urwango no koshya abantu ngo bakore ikibi mu ruhame.

Loni yavuze ko itewe impungenge n’ikibazo cy’umutekano muke muri Repubulika Iharanira Demokarasi ya Congo n’ibitero by’imitwe nka M23 na CODECO bikomeje kwiyongera ndetse n’imitwe yo mu bindi bihugu iri muri RDC nka FDLR, ADF, Red Tabara ikomeje guteza ikibazo ku mutekano w’akarere.

Dujarric ati "Turahamagarira imitwe yose yitwaje intwaro guhagarika ako kanya ibikorwa byose by’ihohoterwa. Turasaba imitwe y’abanye-Congo kujya muri gahunda yo gushyira intwaro hasi, gusubiza mu buzima busanzwe ndetse n’imitwe y’abanyamahanga gushyira intwaro hasi igatahuka mu bihugu yaturutsemo".

Mu gihe u Rwanda rukomeje gushinja RDC ubushotoranyi, iki gihugu na cyo kivuga ko u Rwanda na rwo rushyigikiye umutwe wa M23 umaze iminsi warubuye imirwano.

Umuvugizi wa Guverinoma y'u Rwanda, Yolande Makolo yibukije ko ubushotoranyi bwa RDC budakwiye kurenzwa ingohe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .