U Rwanda rwanikiye Kenya mu kwakira inama mpuzamahanga

Yanditswe na Evariste Nsengimana
Kuya 20 Nzeri 2018 saa 06:53
Yasuwe :
0 0

Urwego rw’ubukerarugendo n’amahoteli mu Rwanda rukomeje kuza imbere y’urwa Kenya, mu kubengukwa n’abategura inama mpuzamahanga.

Muri Gicurasi uyu mwaka, Ishyirahamwe Mpuzamahanga rishinzwe ibyo gutegura Inama zikomeye (ICCA), ryashyize u Rwanda by’umwihariko Umujyi wa Kigali ku mwanya wa gatatu muri Afurika nka hamwe mu hantu hakunzwe n’abategura inama mpuzamahanga.

Ku mwanya wa Mbere hari uwa Cape Town, uwa kabiri haza Johannesburg yombi yo muri Afurika y’Epfo, naho Kenya iza ku mwanya wa kane.

Iyi Raporo yashyize u Rwanda kuri uyu mwanya yibanze ku nama mpuzamahanga zizwi zahabereye by’umwihariko iziba mu gihe runaka (inshuro imwe cyangwa ebyiri mu mwaka) zikitabirwa n’abantu basaga 50.

Zirimo nk’Inama Nyafurika mu bushakashatsi n’amahugurwa ku ndwara ya Kanseri, Inama y’Ubutegetsi y’Ikigega Global Fund, Inama y’Ishyirahamwe rya Afurika ryita ku Bukerarugendo (ATA), Inama rusange y’Ishyirahamwe rya Sosiyete zitwara abantu mu ndege muri Afurika (AFRAA) n’izindi.

By’umwihariko iri shyirahamwe ryerekanye ko mu nama zikomeye ibihugu byombi biheruka kwakira, u Rwanda rwakiriye 21 mu gihe Kenya ari 17 gusa.

Bamwe mu bashoramari bo muri Kenya babwiye The East African ko impamvu u Rwanda ruri kuyanikira ariko ko hoteli zaho zidashyira mu bikorwa politiki n’ingamba by’ubukerarugendo.

Uretse kuba Umujyi wa Kigali uzwiho no guhiga indi mu isuku, umutekano no kwakira neza abashyitsi, hari n’abashoramari bo muri Kenya bagaragaje ko Guverinoma yabo idatera ingabo mu bitugu cyangwa ngo imenyekanishe ibikorwa byatuma hakirirwa inama zikomeye.

Uwashinze ikigo kizobereye mu gutegura inama muri Kenya(Zuri Events and Convener of the MICE Summit), Kezy Mukiri, yavuze ko n’ubu bigaragara ko u Rwanda rufite inama nyinshi rwitegura kwakira ugereranyije n’icyo gihugu.

Ati “Nk’ubu urebye ku ngengabihe ya MICE ( Kwakira ibiganiro, inama mpuzamahanga ku ishoramari n’ibikorwa bitandukanye) urasanga u Rwanda arirwo ruzakira inama nyinshi ugereranije na Kenya. Ni ukubera ko imiryango mpuzamahanga ibona ko ruzi kwicuruza nk’ahantu heza ho kwakirira abantu.”

Ubwo budasa kandi ngo u Rwanda rubukesha Ikigo gishinzwe kumenyekanisha Ubukerarugendo bushingiye ku Nama cyashyizweho mu 2014.

Mukiri yakomeje asaba Guverinoma ya Kenya gukora uko ishoboye igashyiraho ikigo gisa n’icyo niba yifuza kugera ku rwego u Rwanda rugezeho.

Umwaka ushize u Rwanda rwakiriye abashyitsi 28 308 bitabiriye inama bavuye ku 23 804 mu mwaka wa 2016.

Ubukerarugendo bushingiye ku nama bwinjirije u Rwanda miliyoni 42 z’amadolari mu 2017. Uyu mwaka hitezwe miliyoni z’amadolari 74.

Mu 2017, ubukerarugendo bwa Kenya bwari bubumbatiye 9,7% by’umusaruro mbumbe wayo, ni ukuvuga amashilingi miliyari 769.1 (wose wari miliyari 74.94$.)

Kigali Convention Centre ni hamwe mu hantu hakira inama zikomeye mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza