00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwahawe inguzanyo ya miliyari 7,5 Frw yo kubakisha ishuri ry’imyuga n’ubumenyingiro

Yanditswe na Ntabareshya Jean de Dieu
Kuya 18 July 2022 saa 06:30
Yasuwe :

U Rwanda rwasinyanye amasezerano y’ubufatanye na Banki yo muri Autriche, UNICREDIT Bank, ya miliyoni 7,5 z’amayero ni ukuvuga asaga miliyari 7,5 Frw yitezweho guteza imbere amashuri y’imyuga n’ubumenyingiro mu Rwanda.

Kuri uyu wa Mbere tariki ya 18 Nyakanga 2022, ni bwo aya masezerano yashyizweho umukono aho u Rwanda rwari ruhagarariwe na Minisitiri w’Imari n’Igenamigambi, Dr Uzziel Ndagijimana mu gihe Autriche yari ihagarariwe n’uwahoze ayobora iki gihugu Alfred Gusebauer.

Minisitiri w’Imari n’Igenamigambi, Dr Uzziel Ndagijimana yavuze ko aya masezerano aje kongera imbaraga muri gahunda Guverinoma yihaye yo kugera nibura mu 2024 abanyeshuri bangana na 60% biga mu mashuri y’imyuga n’ubumenyingiro.

Ati “Iyi nkunga ije gushyigikira gahunda ya Guverinoma yo guteza imbere ubumenyingiro bigendanye na Gahunda y’iterambere rirambye, NST1 aho ubukungu bw’igihugu buzaba bushingiye ku kongera umubare w’abasoza amashuri y’imyunga n’ubumenyingiro bafite ubumenyi bukenewe ku isoko ry’umurimo.”

Yavuze ko nubwo u Rwanda rwakoze byinshi mu rwego rwo guteza imbere amashuri y’imyuga n’ubumenyingiro ariko irigiye kubakwa ku bufatanye na guverinoma ya Autriche ari rizaba riri ku rwego rwo hejuru.

Ati “Twubatse amashuri y’imyuga n’ubumenyingiro ariko iri shuri rizaba rifite umwihariko kuko ridasanzwe. Turi gutegura andi mashuri nk’ayo nibura muri buri karere kandi duteganya ko nibura twagera ku banyeshuri 60% muri ayo mashuri. Twifuza kuzamura ubumenyi mu rubyiruko, guhanga imirimo ndetse no kwihangira imirimo bityo rero uyu mushinga uzahura neza n’ingamba z’igihugu z’iterambere.”

Minisitiri Ndagijimana yakomeje agaragaza ko ayo masezerano agamije guhindura imyumvire ku masomo y’imyuga n’ubumenyingiro kuko azahindura ishusho y’imyuga izibandwaho muri ayo masezerano.

Uwahoze ari Umuyobozi Mukuru wa Autriche, Alfred Gusebauer, yavuze ko gukorana n’u Rwanda ari inzira nziza yo kugera muri Afurika cyane ko ari igihugu cyakoze ibishoboka byose ngo giteze imbere amashuri y’imyuga n’ubumenyingiro.

Yavuze ko mu gihe byaramuka bigenze neza muri uyu mushinga ugamije guteza imbere ubumenyingiro mu Rwanda bashobora kongera gukorana na Leta muri gahunda zigamije iterambere by’umwihariko muri aya masomo y’ubumenyingiro.

Ingingo zigize aya masezerano

Nubwo aya masezerano afite agaciro kangana na miliyari 7,5 Frwni, ideni biteganyijwe ko rigomba kwishyurwa nibura mu myaka 18, 5 ariko rikazatangira kwishyurwa nyuma y’imyaka umunani n’amezi atandatu.

Aya mafaranga ariko ntabwo yose azishyurwa kuko mu masezerano biteganyijwe ko u Rwanda rwahawe inkunga ingana na 15% byayo.

Mu masezerano kandi biteganyijwe ko hagomba kubakwa ishuri ry’icyitegererezo mu cyanya cyahariwe inganda i Kigali ahazwi nka Special Economic Zone i Masoro kandi rikazubakwa na sosiyete yo muri Autriche ya Global Housing Solutions.

Ambasaderi wa Autriche mu Rwanda akagira icyiciro i Nairobi muri Kenya, Christian Fellner, yavuze ko bifuza kubaka ishuri rigaragaza impinduka mu mashuri y’imyuga n’ubumenyingiro by’umwihariko mu birebana n’amazi, amashanyazi n’andi masomo akunze gusigazwa inyuma.

Ati “Nkurikije n’ibibazo njyewe nkunze kubona aho ndi nkeneye abatekinisiye, abakora ibirebana no gusana no gutunganya amazi, ababaji, abakanishi ndetse usanga n’amafaranga yose ambasaderi yakwishyura bigorana kubona umuntu wakora akazi neza.”

Yongeye ati “Twashyizeho uburyo umuntu ashobora kuba ari ku ishuri ariko ari no gukora kandi ibyo birafasha kuko abantu baba bafite akazi. Nkunda kubwira abantu muri Afurika nti niba ushaka kwiga ‘philosophy’ cyangwa amateka ni byiza ariko niba ushaka kubona akazi erekeza mu mashuri ya TVET.”

Iri shuri rizubakwa i Masoro aho imirimo yo kubaka igomba guhita itangira mu gihe cya vuba.

Ubuyobozi bwa sosiyete izakurikirana imirimo y’ubwubatsi bwatangaje ko nibura mu gihe cy’amezi 12 rizaba ryaruzuye ku buryo abantu bakorera mu nganda bazaba batangiye kuhahererwa ubumenyi.

Umunyamabanga wa Leta muri Minisiteri y’Uburezi Ushinzwe Amashuri y’Imyunga, ubumenyingiro n’Ikoranabuhanga, Irere Claudette yabwiye itangazamakuru ko iri shuri rizafasha benshi kunguka ubumenyi bukenewe mu nganda by’umwihariko abahakorera.

Ati “Akenshi usanga ahantu hari ibyanya by’ubucuruzi ndetse n’inganda haba hari amashuri ariko twebwe nta shuri twahagiraga. Impamvu riba rikenewe ni uko abakoramo baba bakeneye abakozi batandukanye. Dusanga abakoreramo iyo bakeneye abafite ubumenyi bwihariye bajya kubushakira hanze.”

“Ibi rero biri mu rwego rwo kudufasha kubaka ishuri rifite ibisabwa bishoboka kandi byinshi ku buryo abo tuzajya dukenera muri izo nganda bizajya byoroha guhita bahabwa amahugurwa.”

Irere yavuze ko hari gahunda yo kubaka nibura ishuri ry’icyitegererezo muri buri Karere ku buryo amashuri y’imyuga n’ubumenyingiro atezwa imbere.

Kugeza ubu mu Rwanda hari amashuri atatu y’icyitegererezo arimo Rwanda Coding Academy ryigisha ibirebana n’ikoranabuhanga, Africa Digital Media Academy ndetse n’Ishuri rya muzika ryo ku Nyundo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .