U Burundi bwafunze imipaka yo ku butaka kubera COVID-19

Yanditswe na Akayezu Jean de Dieu
Kuya 8 Mutarama 2021 saa 08:40
Yasuwe :
0 0

Leta y’u Burundi yatangaje ko bitewe n’ubukana icyorezo cya COVID-19 gifite muri icyo gihugu guhera ku wa Mbere w’icyumweru gitaha imipaka yo ku butaka no mu mazi izaba ifunze mu gihe abinjira mu gihugu bakoresheje indege bazajya bashyirwa mu kato k’iminsi irindwi.

Uyu mwanzuro wafashwe nyuma y’aho Minisitiri w’Ubuzima mu Burundi, Dr. Thaddée Ndikumana, ku wa Gatatu w’iki cyumweru yatangaje ko habonetse abantu bashya 40 banduye Coronavirus. Ni nshuro ya mbere hari hagaragaye ubwandu bungana gutya kuva muri Werurwe 2020.

Itangazo ryashyizwe ahagaragara na Komite ishinzwe kurwanya ikwirakwira rya COVID-19, rivuga ko imipaka yo ku butaka no mu mazi izafungwa guhera ku wa Mbere tariki 11 Mutarama 2020.

Komiseri wa Polisi, Gen Gervais Ndirakobuca, ni we washyize umukono kuri iri tangazo rikubiyemo ingamba zikakaye igihugu cye cyafashe nyuma yo gukeka ko ubwandu bushya buheruka kugaragara bwazanywe n’abantu bava mu mahanga.

Mu zindi ngamba zafashwe n’u Burundi harimo kuba abantu bose binjira mu gihugu bakoresheje indege, bazajya babanza gushyirwa mu kato k’iminsi irindwi. Ubusanzwe bamaraga iminsi itatu bategereje ibipimo bya Coronavirus.

Hanashyizweho kandi amahoteli azajya yifashishwa mu kwakira abantu bavuye mu mahanga mu gihe bazaba bari mu kato k’iminsi itandatu.

Muri iki gihugu kandi kuva ku wa Mbere hazatangizwa uburyo bwo gupima ku buntu buri wese ubishaka akaba yumva afite ibimenyetso by’icyorezo cya Coronavirus birimo inkorora, umuriro, kunanirwa n’ibindi.

Imibare itangazwa na Minisiteri y’Ubuzima mu Burundi, igaragaza ko abantu 884 aribo bamaze kwandura Coronavirus mu gihe babiri aribo bamaze kwicwa nayo.

Abandura Coronavirus mu Burundi babonetse ari 40 mu munsi umwe wo ku wa Gatatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .