00:00:00 IGIHE NETWORK KN KINYARWANDA EN ENGLISH FR FRANCAIS

Tshisekedi arashaka ko abavuga Ikinyarwanda muri Congo bajya he?-Amb. Polisi Dennis

Yanditswe na Akayezu Jean de Dieu
Kuya 29 Ukuboza 2022 saa 07:31
Yasuwe :

Abashakashatsi n’abakurikiranira hafi ibibera muri Repubulika Iharanira Demokarasi ya Congo bagaragaza ko nibura amoko yo muri Congo abarirwa mu 250, bagendera ku mico, ururimi ndetse n’aho batuye .

Bahuriza kandi ku kuba RDC ifite amoko manini ane arimo; Abaruba bangana na 18% by’abaturage bose batuye iki gihugu gituwe n’abarenga miliyoni 92.

Hari kandi andi moko arimo Abamongo bangana na 17% by’abaturage bose, Abacongo bangana na 12%, abavuga Ikinyarwanda bo bangana na 10%, aha harimo Abahutu n’Abatutsi.

Ikindi bemeranyaho ni uko hariho n’amoko mato arimo aba-Lunda, aba-Tetela, aba-Tchokwe, aba-Bangala, aba-Shi, aba-Nande, aba-Hunde, aba-Tembo, aba-Bembe n’andi moko menshi.

Muri iki gihugu gifite ubuso bwa kilometero kare miliyoni 2.4, harimo n’imiryango myinshi itari ubwoko.

Ikindi kintu gikomeye abantu bakunze kwirengagiza ni uko muri iki gihugu havugwa indimi zirenga 700 ndetse Ikinyarwanda kikaba kiri mu ndimi zikoreshwa cyane.

Abavuga Ikinyarwanda bazwi nka ‘Aba-Rwandophones’ biganje mu Burasirazuba bw’igihugu, muri Kivu y’Amajyepfo n’Amajyaruguru.

Amateka agaragaza ko aba baturage bamwe bisanze muri Congo kuko ubutaka bari batuyeho bwashyizwe kuri icyo gihugu buvuye ku Rwanda ubwo hacibwaga imipaka nyuma y’inama y’i Bruxelles mu Bubiligi yabaye kuwa 8 Gashyantare 1910, imyanzuro yayo ikemezwa kuwa 24 Gicurasi 1910.

Iki gihe nibwo hatangiye gukatwa imipaka y’u Rwanda yagejeje mu wa 1912.

Uburyo imipaka yaciwe hagiye hagenderwa ku buryo karemano nk’imigezi n’ibiyaga, imisozi n’ibibaya n’ibindi. Aha niho havuye kuba u Rwanda rwaratakaje ibice nka Goma, Masisi, Rutshuru na Idjwi.

Ni ukuvuga ko ibyo bice byarimo abaturage bafite umuco Nyarwanda kandi bavugaga Ikinyarwanda nyuma baje kugenda biyongeraho abandi baturage ari nako bagukira mu bindi bice by’igihugu.

Abandi bahagiye mu gihe cy’Ubukoloni bajyanywe n’Ababiligi kujya gukora mu birombe by’amabuye y’agaciro no gushakira ubundi butunzi abakoloni, bagumayo gutyo.

Mu 1970 Mobutu Sese Seko wari Perezida yabihaye umurongo, hashyirwaho itegeko riha ubwenegihugu Abanye-Congo bose barimo Abanyarwanda n’Abarundi bageze muri icyo gihugu mbere ya 1950.

Ikibazo cy’Abanye-Congo bavuga Ikinyarwanda cyatangiye kuzamuka cyane nyuma y’ubwigenge bwa Congo mu 1960 ubwo hagabanywaga ubutaka, abiyita abanye-Congo gakondo bashaka kubwima abavuga Ikinyarwanda bafataga nk’abanyamahanga.

Abaturage bavuga Ikinyarwanda muri Repubulika Iharanira Demokarasi ya Congo, bakunze gufatwa nk’intandaro y’ibibazo by’umutekano mucye muri iki gihugu bakanashinjwa ko ari abanyarwanda.

Amateka yongeye kwisubiramo ku ngoma ya Félix Antoine Tshisekedi Tshilombo yatangiye mu 2019.

Byatangiranye muri Gicurasi ubwo Ingabo za Leta, FARDC n’imitwe irimo FDLR zuburaga imirwano n’Abarwanyi b’Umutwe M23. Kuva icyo gihe abavuva Ikinyarwanda batangiye kwibasirwa, barasenyerwa, baricwa, barameneshwa kugeza n’uyu munsi aho bari hose barageramiwe.

Umuryango w’Abibumbye uherutse gutanga umuburo ko nihatagira igikorwa muri Repubulika Iharanira Demokarasi ya Congo hashobora kuba Jenoside ku baturage b’iki gihugu bavuga Ikinyarwanda cyane cyane abo mu bwoko bw’Abatutsi.

Mu butumwa uyu muryango washyize hanze wavuze ko "Imvururu ziri muri Repubulika Iharanira Demokarasi ya Congo ari ikimenyetso cy’uko hakiri uburyo butuma urwango rwavuyemo Jenoside mu bihe byashize rukomeza guhererekanwa."

Loni yatanze uyu muburo mu gihe muri Repubulika Iharanira Demokarasi ya Congo hamaze iminsi hari imvugo zibiba urwango ku baturage bavuga Ikinyarwanda cyane cyane abo mu bwoko bw’Abatutsi ndetse n’ibikorwa bibibasira.

Tshisekedi arashaka ko abavuga Ikinyarwanda muri Congo bajya he?

Ikibazo umuntu wese yibaza ari nacyo Amb Polisi Denis uri mu bagize Urwego Ngishwanama rw’Inararibonye yibaza, ni uburyo abaturage baba mu gihugu kuva mu binyejana by’imyaka, ndetse akaba ari nayo nkomoko yabo bashobora kwirukanwa mu gihugu.

Amb Polisi Denis yavuze ko ubusanzwe iyo Congo ivugwa uyu munsi yabayeho ubwo Abadage bari bamaze kumvikana n’Ababiligi ku bw’amasezerano mu 1910-1913 bakabaha ibice bimwe by’u Rwanda. Ubu ni mu Burasirazuba bwa Congo.

Ati “Iyo biyemeza ngo abavuga Ikinyarwanda nibave ku butaka bwa Congo bagira ngo bajye he kandi bari iwabo?”.

Yakomeje agira ati “Umuntu ashobora kwibaza, ubutegetsi bwa Félix [Perezida Tshisekedi ] bushaka ko abantu bavuga Ikinyarwanda bari muri Congo mbere y’kinyejana cya 17 , mbere y’uko Abakoloni baca imipaka ya Afurika bava ku butaka bwabo bakajya he? Ururimi, imico, amazina y’ahantu n’abantu ni Ikinyarwanda.”

Avuga ko yaba Umuryango w’Abibumbye ndetse n’Umuryango wa Afurika Yunze Ubumwe byagiye byinjira muri iki kibazo mu bihe bitandukanye ndetse hakabaho n’amasezerano yo kubikemura asinywa ariko ntashyirwe mu bikorwa.

Amb Polisi ati “ Amakosa ni ayande? Loni na AU byashyizeho amasezerano yo kudahungabanya imipaka yasizwe n’ubukoroni? None ko mbona bigira nyoni nyinshi ni ukugira ngo bidahungabanya inyungu bifite cyangwa bishobora kubona muri Congo maze na Jenoside bakayibona ikorwa bakaruca bakarumira ?’’

Yakomeje agira ati “Ibyo ari byo byose ‘ ukuri guca muziko ntigushye’ kandi ufite impamvu arwanira, ntasinzira igihe cyose ataratsinda urugamba. Abanyarwanda baca umugani ngo’ Ikinyago gisuzuma umugisha, abo bose bagira inama Tshisekedi bamenye ko "inama irakuka si karande."

Umuti waba ihindurwa ry’ubutegetsi muri RDC

Amb Polisi Denis nk’umuntu wakurikiranye ibibazo bibera muri RDC ndetse akaba yaranabaye muri iki gihugu, avuga ibibazo byose iki gihugu gifite uyu munsi ari ubuyobozi bubi.

Mu kiganiro yagiranye na IGIHE yavuze ko kwibasira abavuga Ikinyarwanda ari urwitwazo rwa Perezida Tshisekedi nyuma y’uko ibyo yemereye Abanye-Congo, ubwo yiyamazaga atabibagejejeho.

Ati “Nka we [Perezida Tshisekedi] yari afite ibibazo bitatu, yiyamaza yavuze ko agomba kugarura amahoro muri RDC, none amahoro ntabwo yagarutse. Ibyo ni ikibazo kuri we kandi amatora aregereje.”

Yakomeje agira ati “Ikindi cya kabiri yari yabijeje kurwanya ruswa, none guhera iwe mu biro harimo ruswa. Nawe ubwe yatanze ruswa kugira ngo bose bamagane abavuga Ikinyarwanda, ikindi ni iterambere yari yemeye.”

Amb Polisi Denis avuga ko kuba ibyo byose atarabikoreye abaturage ari igisebo kuri we ndetse umuti wo kugira ngo azongere abasubire imbere abasaba amajwi ari kuwushakira mu kwegeka ibibazo byose igihugu gifite ku bavuga Ikinyarwanda.

Ati “Ibyo byose rero ntabwo byatuma yiyamamaza ngo abone icyo abwira abanye-Congo, ariko ubu aravuga ati ibitarashobotse byose nibo babiteye.”

Amb Polisi avuga ko umuti w’ibi bibazo waba kugira ubuyobozi bwiza, bureba kure ndetse bukorera mu nyungu z’abaturage.

Ati “Ubuyobozi bubi akenshi bwifashisha impamvu zitari zose, bugashaka kuyobya abaturage. Umuti waba guhinduka k’ubuyobozi bwa RDC, nta kindi gishobora gukemura ibibazo igihugu gifite by’umwihariko ibyo kwibasira abavuga Ikinyarwanda.”

Yakomeje agira ati “Iyo Perezida Tshisekedi akora biriya, abaturage babibonamo nko kurwanira inyungu z’igihugu cyabo kandi mu by’ukuri ntabwo ariko bimeze, ni ibintu bisanzwe muri politiki, uwananiwe kugeza ku baturage iterambere, ahimba igice cy’abantu abyegekaho.”

Kenshi muri iki gihe inyeshyamba za M23 zubuye intwaro, Abanyarwanda n’Abanye-congo bavuga Ikinyarwanda bagiye bicwa cyangwa bagahohoterwa biturutse ku magambo y’urwango agenda avugwa na bamwe mu banyepolitiki, bashinja u Rwanda guha inkunga M23, ibyo u Rwanda ruhakana.

Tshisekedi ari gushakira urwitwazo ku bavuga Ikinyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .