Tanzania yatanze isoko ryo kubaka igice cy’umuhanda wa gari ya moshi uzagera mu Rwanda

00:00:00 IGIHE NETWORK

KINYARWANDA

ENGLISH

FRANCAIS

Tanzania yatanze isoko ryo kubaka igice cy’umuhanda wa gari ya moshi uzagera mu Rwanda

Yanditswe na Jean Paul Rutagengwa

Kuya 21 Ukuboza 2022 saa 08:02

Yasuwe :

Yavuzweho:

Guverinoma ya Tanzania yasinyanye amasezerano n’ibigo byo Bushinwa, yo kubaka icyiciro cya nyuma cy’umuhanda wa gari ya moshi witezweho guhuza icyambu cya Dar es Salaam n’ibihugu bituranye birimo n’u Rwanda.

Ayo masezerano yashyizweho umukono kuri uyu wa Kabiri n’Umuyobozi mukuru w’ikigo gishizwe ubwubatsi bwa gari ya moshi muri Tanzania (Tanzania Railway Corporation, TRC) Masanja Kadogosa n’umuyobozi uhagarariye ibigo bibiri byo mu Bushinwa byihurije hamwe, bya CCECC na CRCC.

Ni amasezerano agamije kubaka umuhanda uzahuza Tabora na Kigoma, intera ingana na kilometero 506.

Muri rusange umuhanda wose wa kilometero 2561 byitezwe ko uzahuza icyambu cya Dar es Salaam kiri ku nyanja y’u Buhinde na Mwanza ku kiyaga cya Victoria, hakabaho amashami azagera mu bihugu by’u Burundi, Repubulika Iharanira Demokarasi ya Congo n’u Rwanda.

Kuri uyu wa Kabiri Perezida Samia Suluhu Hassan yakurikiye isinywa ry’aya masezerano afite agaciro ka miliyali $2.2, yo kubaka igice cya nyuma cy’uwo muhanda kizahuza Tabora na Kigoma.

Ni igice biteganyijwe ko kizuzura bitarenze mu 2026, imyaka icyenda uhereye igihe uyu mushinga watangiriye.

Suluhu yavuze ko umuhanda mushya wa gari ya moshi uzagabanya igiciro cy’ubwikorezi, aho nk’ubu kuva ku cyambu cya Dar es Salaam werekeza muri Repubulika Iharanira Demokarasi ya Congo, toni imwe yishyurirwa $6,000.

Ubwikorezi bwa gari ya moshi ngo buzagabanya iki kiguzi kigere nibura ku $4,000, n’urugendo rwakorwaga iminsi mirongo itatu, ibe amasaha 30 kugeza mu 2027.