Tanzania yashyize yemera ko yugarijwe na COVID-19

Yanditswe na Dufitumukiza Salathiel
Kuya 21 Gashyantare 2021 saa 05:06
Yasuwe :
0 0

Minisiteri y’Ubuzima muri Tanzania yashyize yemera ko iki gihugu cyugarijwe n’icyorezo cya COVID-19 inasaba abaturage gufata ingamba zo kukirinda.

Mu itangazo Minisiteri y’Ubuzima yashyize hanze kuri iki Cyumweru yavuze ko Abanya-Tanzania bakwiye gukurikiza ingamba zo kwirinda COVID-19.

Rigira riti "Nk’uko Perezida yabivuze, umwaka ushize twaratsinze ndetse ubukungu bwacu bukomeza kuzamuka kugeza ubwo twageze ku buringanire kandi Coronavirus yari igihari. Ntabwo twigeze dushyiraho Guma mu rugo, n’ubu ntayo, kandi nta n’iyo tuzashyiraho kubera ko Imana iri mu ruhande rwacu.”

Ibyavuzwe n’iyi Minisiteri bisa nko kwerura ikavuga ko mu gihe Leta yamaze ivuga ko nta COVID-19 yari muri iki gihugu yari ihari.

Iri tangazo rya Minisiteri y’Ubuzima rigiye hanze mu gihe hari hashize amasaha make Perezida wa Tanzania, Dr John Pombe Magufuli asabye Abanya-Tanzania kubahiriza amabwiriza yo kwirinda Coronavirus.

Uretse Perezida Magufuli na Minisitiri w’Intebe w’iki gihugu, Kassim Majaliwa, yasabye Abanya-Tanzania gutangira kwambara agapfukamunwa igihe cyose bari mu bantu kandi bakaba badashobora guha intera iri hagati ya metero imwe.

Tanzania ibaye nk’iyerura ku cyorezo cya COVID-19 nyuma y’iminsi yari imaze yotswa igitutu n’inzego zitandukanye muri iki gihugu zirimo Kiliziya Gatolika ndetse n’Urugaga rw’Abanyamategeko ba Tanganyika (TLS).

Kuri iki Cyumweru kandi Umuyobozi w’Ishami ry’Umuryango w’Abibumbye rishinzwe kwita ku buzima, Dr Tedros Adhanom Ghebreyesus, yasohoye itangazo asaba Tanzania kuvugisha ukuri igatanga amakuru ajyanye n’abandura icyorezo cya COVID-19 n’abo gihitana dore ko idaheruka kuyashyira hanze.

Nyuma yo kwemera ko yugarijwe na COVID-19 nyuma y’uko yagiye yumvikana inshuro nyinshi, kuri ubu haribazwa uko bizagenda kubijyanye no gukingira dore ko iki gihugu giherutse kuvuga ko nta nkingo gikeneye.

Leta ya Tanzania yashyize yemera ko yugarijwe n'icyorezo cya COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .