Tanzania yanze gutanga amakuru ku bakekwaho Ebola

Yanditswe na Bukuru JC
Kuya 22 Nzeri 2019 saa 05:43
Yasuwe :
0 0

Ishami ry’Umuryango w’Abibumbye ryita ku Buzima (OMS) ryatangaje ko Tanzania yanze gutanga amakuru arebana n’abo cyaba cyarabonye bakekwaho Ebola.

Uwo muryango watangaje ko inshuro zose wagerageje gusaba ayo makuru utigeze usubizwa.

Mu itangazo OMS yasohoye kuri uyu wa Gatandatu, OMS yavuze ko “Uko kubura kw’amakuru yizewe avuye mu buyobozi bwa Tanzania biteye impungenge.”

Nta cyo ubuyobozi bwa Tanzania bwigeze busubiza ku byatangajwe na OMS, nkuko Al Jazeera yabitangaje.

Tariki 18 Nzeri 2019, OMS yari yatangaje ko Tanzania iherutse kuyitangariza ko nta muntu n’umwe barabona urwaye Ebola, gusa birinda gutangaza niba ntabo babonye bakabakeka.

OMS ivuga ko ayo makuru make nayo yatangajwe nyuma y’ibihuha byavugaga ko hari umugore wagaragaje ibimenyetso bya Ebola, mu Mujyi wa Dar es Salaam nyuma akaza no gupfa.

OMS ivuga ko uwo mugore yapfuye amaze iminsi akoze ingendo zitandukanye hirya no hino mu gihugu ndetse bamwe mu bahuye na we atarapfa bashyizwe mu kato.

Uwo muryango utangaza ko hari n’abandi bantu babiri bivugwa ko bagaragaje ibimenyetso bya Ebola nubwo ubuyobozi bwanze kugira icyo bubivugaho.

Minisitiri w’Ubuzima muri Tanzania, Ummy Mwalimu, aherutse kubwira abanyamakuru ko nta Ebola iri mu gihugu bityo ko abantu badakwiriye kugira ubwoba.

Hashize igihe hari ukwigengesera mu bihugu byo mu Karere k’Ibiyaga Bigari nyuma y’uko muri Repubulika Iharanira Demokarasi ya Congo hadutse icyorezo cya Ebola kimaze guhitana abasaga 2000 mu mezi 13.

Hashize igihe hari ukwigengesera mu bihugu byo mu Karere k’Ibiyaga Bigari nyuma y’uko muri Repubulika Iharanira Demokarasi ya Congo hadutse icyorezo cya Ebola kimaze guhitana abasaga 2000 mu mezi 13

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza