Tanzania yanyomoje amakuru y’uko hagaragaye umurwayi wa mbere wa Coronavirus

Yanditswe na Habimana James
Kuya 7 Werurwe 2020 saa 05:06
Yasuwe :
0 0

Minisitiri w’Ubuzima muri Tanzania, Ummy Mwalimu, yamaganye amakuru yavugaga ko muri iki gihugu hagaragaye umuntu wa mbere ufite ibimenyetso by’icyorezo cya Coronavirus.

Ikinyamakuru, mcmnt.com cyari cyatangaje ko uyu murwayi w’imyaka 36, ari umuturage wo mu murwa mukuru Dodoma.

Cyari cyavuze ko uyu murwayi ngo yasuye igihugu cy’u Butaliyani n’u Bufaransa, hagati ya Mutarama na Gashyantare uyu mwaka.

Iki kinyamakuru cyanditse ko uyu murwayi yamaze gushyirwa ahantu hihariye n’inzego z’ubuzima.

Gusa Minisitiri Ummy abicishije kuri twitter yagize ati “Kugeza ubu nta muntu urwaye Coronavirus uri muri Tanzania, aya ni amakuru y’ibihuha.”

Ishami ry’Umuryango w’Abibumbye ryita ku buzima, OMS, rivuga ko ibihugu ku mugabane wa Afurika bimaze kugerwamo n’iki cyorezo birimo Misiri, Senegal, Algeria, Afurika y’Epfo, Nigeria, Tunisia, Maroc na Cameroon.

OMS ivuga ko iki cyorezo kimaze guhitana abantu 3,500, abandi ibihumbi 100 bamaze kwandura mu bihugu 92 ku Isi.

Mu Ukuboza 2019 nibwo iki cyorezo cyadutse mu Bushinwa mu Mujyi wa Wuhan, ari naho kimaze kwica abantu benshi.

Ibihugu birimo Koreya y’Epfo, u Butaliyani na Iran biri mu bikomeje guhura n’akaga k’iyi virusi.

Nko muri Koreya y’Epfo, ubu abantu barenga ibihumbi birindwi bamaze kwandura.

Muri Iran, Aljazeera yatangaje ko iyi virusi yamaze guhitana umudepite mu Nteko Ishinga Amategeko.

Depite Fatemeh Rahbar w’imyaka 55, yitabye Imana nyuma yo kumara iminsi ibiri ari muri koma, mu bitaro biherereye mu murwa mukuru Tehran.

Minisitiri w'Ubuzima muri Tanzania yamaganye amakuru avuga ko bafite umurwayi wa Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza