Tanzania yafunze ibigo byinshi byifashishwaga mu kuvura Coronavirus

Yanditswe na Rosine Ingabire
Kuya 6 Nyakanga 2020 saa 04:01
Yasuwe :
0 0

Leta ya Tanzania yafunze byinshi mu bigo byifashishwaga mu kuvura no kwita ku barwayi ba Coronavirus, nyuma y’iminsi mike ibikorwa bihuza abantu benshi bikomorewe.

Guverinoma yatangaje ko gufunga ibyo bigo byaturutse ku igabanuka rikomeye ry’abandura coronavirus hirya no hino mu gihugu.

Kuwa Gatanu ushize Minisitiri w’Ubuzima, Ummy Mwalimu yatangaje ko hasigaye ibigo 11 bivurirwamo abanduye coronavirus, birimo ibigo nderabuzima bya Leta n’ibyigenga.

BBC yatangaje ko mbere ibigo byashyirwagamo abarwayi ba Coronavirus muri Tanzania byari bigeze kuri 85.

Minisitiri Mwalimu yavuze ko bashimira Imana kuba coronavirus igenda irangira muri Tanzania. Yasabye abaturage gukomeza kwirinda kugira ngo icyorezo kitongera gukaza umurego.

Yavuze ko kuri ubu ibyo bigo byafunguriwe abaturage bakomeza kubyifashisha bajya kwivuza bisanzwe nk’uko byahoze, kuko nta barwayi ba coronavirus bagihari.

Ntabwo umubare w’abantu bashya bandura cyangwa abicwa na coronavirus muri Tanzania uzwi kuko icyo gihugu kitagitanga ayo makuru guhera muri Gicurasi 2020.

Muri Kamena uyu mwaka Minisitiri w’Intebe Kassim Majaliwa yabwiye abadepite ko abantu 66 aribo basigaranye mu bitaro barwaye coronavirus.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .