Tanzania: Imbuga nkoranyambaga zafunzwe ku munsi ubanziriza amatora

Yanditswe na Tuyishimire Raymond
Kuya 27 Ukwakira 2020 saa 10:54
Yasuwe :
0 0

Abakoresha imbuga nkoranyambaga nka WhatsApp na Twitter muri Tanzania bari kugorwa no kuzinjiramo mu gihe habura amasaha make ngo hakorwe amatora rusange muri iki gihugu.

Kuva mu gitondo cyo kuri uyu wa 27 Ukwakira 2020, abakoresha WhatsApp muri Tanzania ntibashoboraga kumanura amafoto n’amashusho uretse kohereza no kwakira ubutumwa gusa.

Abakoresha urubuga rwa Twitter na bo bafite ikibazo ndetse iri kwinjirwamo hifashishijwe amayeri yo gukoresha imbuga zifunzwe.

BBC yagerageje kuvugana n’abayobozi mu Kigo gishinzwe Kugenzura ibijyanye n’Itumanaho mu gihugu (Tanzania Communication Regulatory Authority (TCRA) ariko ntacyo batangaje kuri iyi ngingo.

Abakoresha izi mbuga bavuga ko guhagarara kwazo gushobora kugira ingaruka ku matora muri Zanzibar, aho abayobozi b’amatora n’abashinzwe umutekano batoye kuri uyu wa Kabiri.

Ishyaka rikomeye ry’Abatavuga rumwe na Leta muri Zanzibar, ACT-Wazalendo, riravuga ko hari abantu umunani bishwe mu mvururu zishingiye ku matora.

Polisi yahakanye ibitangazwa ko hari abishwe gusa ivuga ko hari abagera kuri 40 batawe muri yombi.

Amafoto n’amashusho agaragaza abantu bari gukorerwa ihohoterwa, biri mu byavugishije benshi ku mbuga nkoranyambaga mbere yuko zihagarara.

Ku wa 28 Ukwakira 2020, nibwo biteganyijwe ko muri Tanzania na Zanzibar abaturage bazatora Umukuru w’Igihugu.

Perezida John Pombe Magufuli ubarizwa mu Ishyaka riri ku Butegetsi rya CCM (Chama Cha Mapinduzi) ari gushaka manda ye ya kabiri; kuri ubu ahanganye bikomeye n’umukandida Tundu Lissu.

Abaturage bo muri Tanzania bategereje amatora y''Umukuru w'Igihugu ateganyijwe ku wa 28 Ukwakira 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .