Tanzania: Chadema yasabye abadepite bayo guhagarika imirimo y’Inteko Ishinga Amategeko kubera Coronavirus

Yanditswe na Habimana James
Kuya 1 Gicurasi 2020 saa 08:21
Yasuwe :
0 0

Ishyaka ritavuga rumwe n’ubutegetsi bwa Tanzania, Chama Cha Demokrasia (Chadema), ryasabye abarihagarariye mu Nteko Ishinga Amategeko, guhagarika ibikorwa byo kwitabira imirimo yayo ndetse bakishyira mu kato.

Chadema yafashe uyu mwanzuro nyuma y’aho mu minsi 11 gusa ishize, hapfuye abadepite batatu bicwa n’indwara itaramenyekana.

Umuyobozi Mukuru wa Chadema, Freeman Mbowe, yashinje Leta ya Tanzania kuba yarananiwe guhagarika intera icyorezo cya Coronavirus kiriho mu gihugu, we akaba anemeza ko aba badepite aricyo cyabishe.

Iki cyemezo cyafashwe nyuma y’aho uwari ushinzwe kurinda Itegeko Nshinga muri iki gihugu akaba yari n’umudepite, Augustine Mahiga w’imyaka 74, apfuye kuri uyu wa Gatanu mu buryo butunguranye.

Mu kwezi gushize, Inteko Ishinga Amategeko muri Tanzania, yatangaje ko umwe mu badepite yasangajwe Coronavirus nk’uko The Citizen yabyanditse.

Mbowe yagize ati “Tubabajwe n’uburyo dukomeje kubona abadepite bapfa n’abandi baturage kubera Coronavirus.”

Kugeza ubu leta ntacyo iratangaza ku birimo gutera izi mpfu z’aba badepite ndetse ubuyobozi bw’igihugu bwasabye abaturage kwirinda abakwirakwiza ibihuha ko zaba zifitanye isano na Coronavirus.

Mbowe yahamagariye Inteko kuba ihagaritse imirimo byibuze iminsi 21, abadepite bagapimwa n’imiryango yabo.

Yagize ati “Turatekereza ko hagomba kujyaho ingamba zikomeye mu kurinda abadepite n’abandi baturage, mu gihe ubuyobozi butarafata icyemezo, turashaka ko abadepite bacu barindwa guhera aka kanya kandi bakajya mu kato.”

Kugeza ubu abantu 480 nibo bamaze kwandura Coronavirus muri Tanzania, muri bo 16 bamaze gupfa.

Tanzania ni kimwe mu bihugu bitafashe ingamba zikomeye mu guhanagana na Coronavirus. Kugeza ubu za Kaminuza n’amashuri byarahagaze ariko amasoko yo yakomeje imirimo.

Perezida Pombe Magufuli yasabye ko imirimo yakomeza ahubwo abaturage bagakomeza gusenga.

Umuyobozi Mukuru w'Ishyaka ritavuga rumwe n'Ubutegetsi rya Chadema, Freeman Mbowe, yashinje Leta ya Tanzania kunanirwa guhagarika intera icyorezo cya Coronavirus kiriho mu gihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .