Tanzania: Abanduye Coronavirus bageze kuri 284

Yanditswe na IGIHE
Kuya 22 Mata 2020 saa 12:58
Yasuwe :
0 0

Guverinoma ya Tanzania yatangaje ko kugeza ubu abantu 284 bamaze gusangwamo icyorezo cya Coronavirus mu gihe 10 imaze kubahitana, imibare ikaba ikomeje kuzamuka cyane muri iki gihugu.

Minisitiri w’Intebe, Kassim Majaliwa, yatangaje imibare mishya y’icyo cyorezo kuri uyu wa Gatatu, ubwo yafunguraga ku mugaragaro amasengesho yahuje amadini yose akorera muri Tanzania.

Yagize ati “Igiteranyo cy’abarwayi bose hamwe ni 284 bamaze gusangwamo Coronavirus. Muri abo, abarwayi 256 barimo koroherwa bameze neza, ariko abarwayi barindwi barimo kwitabwaho n’abaganga mu buryo bw’umwihariko, mu gihe 11 bamaze gukira neza.”

Majaliwa yavuze ko abamaze kwicwa n’icyorezo cya Coronavirus muri icyo gihugu bamaze kugera ku 10. Imibare y’abanduye kandi isaranganyije mu bice byose bya Tanzania, nubwo umubare munini wabo ari uwo muri Dar Es Salaam.

Imibare y’abanduye Coronavirus muri Tanzania ikomeje kuzamuka mu gihe iki gihugu gisigaye muri bike cyane ku isi bitarashyiraho amabwiriza asaba abantu bose kuguma mu ngo, mu gukumira iki cyorezo.

Perezida wa Tanzania Dr John Pombe Magufuli, aheruka gusaba abaturage gufata iminsi itatu basenga Imana ngo ibakize iki cyorezo.

Kugeza ubu muri Afurika y’Iburasirazuba hamaze kwandura abantu barenga 520, aho ibihugu bifite benshi ari Kenya (296), Tanzania (284), u Rwanda (150), Uganda (61), u Burundi (11) na Sudani y’Epfo (4).

Minisitiri w'Intebe waTanzania Kassim Majaliwa yatangaje ko abanduye Coronavirus muri Tanzania bageze kuri 284

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .