Sudani y’Epfo: Riek Machar yanze icyemezo cyo gushyiraho uduce twihariye

Yanditswe na Ferdinand Maniraguha
Kuya 16 Gashyantare 2020 saa 04:07
Yasuwe :
0 0

Riek Machrar yanze ibyemezo byari byafashwe na Perezida Salva Kiir bigamije kugarura amahoro birimo gushyiraho Leta icumi n’utundi duce dutatu tuyobowe mu buryo bwihariye.

Uku gutera utwatsi ibi byemezo kugaragaza imbogamizi mu kugera ku mahoro arambye muri iki gihugu cyinjiye mu mvururu mu 2013 nyuma y’imyaka ibiri kibonye ubwigenge. Kugeza ubu abasaga ibihumbi 380 bamaze gupfa mu gihe miliyoni nyinshi zahunze abandi bari mu bukene bukabije.

Kiir na Machar uri mu buhungiro bari ku gitutu mpuzamahanga cyo kuba bashakiye igisubizo ibibazo bafitanye bitarenze tariki 22 Gashyantare.

Kuri uyu wa Gatandatu, Perezida Kiir yavuze ko igihugu kizagabanywamo Leta nshya icumi ndetse n’utundi duce dutatu dufite imiyoborere yihariye aritwo Pibor, Ruweng na Abyei.

Machar yavuze ko yishimiye kuba Kiir yemeye gushyiraho Leta nshya icumi ariko yamagana ibyo gushyiraho uduce dutatu dufite imiyoborere yihariye.

Yavuze ko utwo duce tudakwiriye guhabwa ubuyobozi bwihariye kuko byaba bihabanye na gahunda ya Leta icumi zindi zashyizweho.

RFI yatangaje ko agace ka Ruweng kamaze igihe katavugwaho rumwe n’abo mu bwoko bw’abadinka Salva Kiir akomokamo n’aba-Nuers Riek Machar akomokamo. Ni agace gakungahaye kuri peteroli ndetse iyo icyo gihugu kijyana hanze inyinshi niho ituruka.

Pibor nayo ni agace gakora kuri Ethiopia kakunze kurangwa n’imvururu zishingiye ku bworozi. Agace ka Abyei ni agace katavugwaho rumwe kagenzurwa na Sudani ariko Sudani y’Epfo nayo irakiyitirira.

Machar avuga ko gushyira utwo duce ku ruhande , ari uburyo bwa Leta bwo gukomeza kutugenzura no kudukoresha icyo ishaka. Yasabye Kiir kubihindura mu maguru mashya.

Umubare wa Leta muri Sudani y’Epfo ni ingenzi cyane mu miyoborere yayo kuko ari naho hashingirwa ku kugabana ubutegetsi mu gihugu.

Ubwo Sudani y’Epfo yabonaga ubwenegihugu mu 2011, itegeko Nshinga ryashyizweho ryagenaga ko igihugu kigira Leta 10.

Kiir yaje kongera izo Leta ziba 28, arongera azigeza kuri 32 kugeza ubwo kuri uyu wa gatatu yazisubizaga ku icumi n’uduce dutatu dufite imiyoborere yihariye.

Perezida Kiir yavuze ko gusubizaho Leta icumi ari umwanzuro ubabaje ariko ukwiriye ngo igihugu kibone amahoro.

Machar na Kiir basinye amasezerano y’amahoro mu 2018 nyuma y’igitutu bashyirwagaho n’umuryango mpuzamahanga. Kuva icyo gihe kugeza ubu gushyiraho Guverinoma y’ubumwe bisa nk’ibyananiranye.

Machar na Kiir bahawe itariki 22 Gashyantare 2020 kuba barangije gufatira umwanzuro ibyo batumvikanaho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza