Sudani: Bashir yashinjwe kwakira miliyoni 90 z’amadolari yahawe na Arabie Saoudite

Yanditswe na Akayezu Jean de Dieu
Kuya 19 Kanama 2019 saa 10:20
Yasuwe :
0 0

Ubushinjacyaha bwabwiye Urukiko rw’i Khartoum muri Sudani ko Omar al-Bashir wahoze ari Perezida w’iki gihugu yakiriye akayabo ka miliyoni 90 z’amadolari yahawe na Arabie Saoudite.

Bashir yagejejwe imbere y’Urukiko kuri uyu wa Mbere tariki 19 Kanama 2019, ngo yiregure ku byaha bya ruswa ashinjwa, ibintu umwunganira mu mategeko avuga ko nta shingiro bifite.

Uyu mugabo wayoboye Sudani imyaka 30, yahiritswe ku butegetsi n’igisirikare ku wa 11 Mata uyu mwaka nyuma y’imyigaragambyo yari imaze igihe muri iki gihugu.

Reuters yavuze ko Bashir wagejejwe imbere y’urukiko yambaye ikanzu y’umweru n’igitambaro yafunze mu mutwe atigeze abasha kugira icyo avuga ku byo ashinjwa.

Bivugwa ko yavuze rimwe gusa ubwo umucamanza yahamagaraga izina rye amubaza niba koko ariwe, gusa ngo yasetse ubwo yabazwaga aho yari atuye, ahita asubiza umucamanza ko “Mbere mu karere k’ikibuga cy’indege ku biro bya gisirikare ariko ubu ni muri gereza ya Kobar.”

Umupolisi wakoze iperereza kuri Bashir, Ahmed Ali Mohamed yabwiye urukiko ko uyu mugabo yakiriye miliyoni 25 z’amadorali yahawe n’Igikomangoma cya Arabia Saoudite, Mohammed Bin Salman.

Yakomeje avuga ko Bashir w’imyaka 75 y’amavuko yagiye yakira andi mafaranga avuye muri Arabia Saoudite ku buryo yose hamwe agera muri miliyoni 90 z’amadolari ya Amerika.

Uwunganira Bashir, Ahmed Ibrahim yavuze ko nta makuru cyangwa ibimenyetso bishimangira ibyaha bishinjwa umukiliya we.

Ibyaha byose bishinjwa Bashir birimo ruswa, gutunga amafaranga y’amanyamahanga atazwi aho yavuye, gutera inkunga imitwe y’iterabwoba ,kwakira impano zitemewe n’amategeko no gutegeka kwica abigaragambya.

Biteganyijwe ko iburanishwa rizasubukurwa ku wa Gatandatu w’iki Cyumweru.

Bashir yavuzweho kwakira miliyoni z'amadolari yahawe na Arabia Saudite

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza