Sudan yemeye gutanga impozamarira ku bitero byagabwe kuri ambasade za Amerika ku butegetsi bwa Bashir

Yanditswe na IGIHE
Kuya 26 Nzeri 2020 saa 06:47
Yasuwe :
0 0

Minisitiri w’Intebe wa Sudan, Abdallah Hamdok, yemeje ko bamaze gukusanya amafaranga yo gutangwa nk’impozamarira ku bitero byagabwe kuri ambasade za Leta Zunze Ubumwe za Amerika mu 1998, ubwo icyo gihugu cyayoborwaga na Omar el-Bashir.

Ni igikorwa yatangaje ko Sudan irimo gukora kugira ngo ibe yakurwa na Amerika ku rutonde rw’ibihugu bitera inkunga iterabwoba, nubwo icyemezo cya nyuma kitarafatwa.

Ibyo bitero by’iterabwoba byo mu 1998 byagabwe kuri ambasade za Leta Zunze Ubumwe za Amerika muri Tanzania na Kenya, bihitana abantu benshi. Ubutabera bwa Amerika bwaje kwemeza ko byagizwemo uruhare na Leta ya Khartoum muri icyo gihe.

Hari amakuru avuga ko Sudan yamaze gutegura miliyoni $335 zakoreshwa mu gutanga impozamarira, ariko Inteko Ishinga Amategeko ya Amerika ikemeza ko ihanagurwaho amabi yose yakozwe ku butegetsi bwa Bashir buheruka gukurwaho, nk’uko byatangajwe na RFI.

Mbere y’uko ariko hagira amasezerano yemeranywaho, Sudan ngo inasaba ko Amerika yanayiguriza miliyari $10 nk’inkunga yo mu myaka myinshi, hagamijwe kuzahura ubukungu bw’icyo gihugu.

Hari n’amakuru ko bishoboka cyane ko mbere y’uko hagira icyemeranywaho, Amerika ishobora gusaba Sudan kubanza kuzahura umubano wayo na Israël, nk’uko iheruka kubigenza hagati ya Bahreïn na Leta Zunze Ubumwe z’Abarabu.

Ni ingingo ifatwa nk’ishobora gutuma Trump yiyongerera amanota mbere y’amatora ateganyijwe mu kwezi gutaha, kubera ububasha yaba akomeje kugaragaza mu gukora nk’umuhuza hagati y’ibihugu bimaze igihe birebana ay’ingwe.

Sudan yemeye gutanga impozamarira ku bitero byagabwe kuri ambasade za Amerika ku butegetsi bwa Bashir

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .