Somalia: Hahishuwe ko Al-Shabab isahura imisoro myinshi kuruta ijya mu isanduku ya leta

Yanditswe na Ishimwe Deborah
Kuya 28 Ukwakira 2020 saa 01:17
Yasuwe :
0 0

Abaturage bo muri Somalia batuye mu duce tugenzurwa na guverinoma y’iki gihugu, binubira kwishyura imisoro inshuro ebyiri, kuko bishyura Leta n’abarwanyi b’umutwe w’iterabwoba wa Al-Shabab.

Iki gihugu gikomeje kurangwamo umutekano muke uterwa n’iterabwoba ry’imitwe yitwaje intwaro, irimo n’uyu wa Al-Shabab, uyobora igice kinini muri iki gihugu.

Uwo mutwe ugenzura igice kinini cy’amajyepfo no hagati muri Somalia, ku buryo imbaraga zawo zinagera mu turere tugenzurwa na guverinoma ifite icyicaro i Mogadishu, ukaka abaturage amafaranga ukoresheje iterabwoba, bigatuma ubasha kubona amafaranga aruta cyane ayo ubuyobozi bw’igihugu bubona.

Ikigo cy’ubushakashatsi cya Hiraal cyatangaje ko aba abarwanyi bakusanya nibura miliyoni 15 z’amadolari ku kwezi, amafaranga arenga kimwe cya kabiri cy’ava mu murwa mukuru Mogadishu.

Raporo yagaragaje ko uburyo uyu mutwe wakamo abaturage amafaranga ari ubugome gusa, kuko bayatangishwa n’ubwoba aho kuba ubushake.

Abashoramari bakorera muri Somalia kandi binubira kuba baha imitwe y’iterabwoba imisoro ndetse bakanayiha guverinoma, aho baha 2.5% by’inyungu babonye buri kwezi undi mutwe w’abarwanyi, hakiyongeraho aya Al-Shabab n’aya guverinoma.

Ikigo cy’ubushakashatsi cya Hiraal cyagaragaje ko kandi abakozi ba Leta baha Al-Shabab igice cy’umushahara wabo kugira ngo barebe ko baramuka kabiri, bitewe n’uko uyu mutwe uba ubatera ubwoba, ukanabahamagara kuri telefoni ubasaba amafaranga.

Umwe mu basirikare bakomeye muri iki gihugu yasobanuye uburyo yahaye Al-Shabab amafaranga bitewe n’uko yari yagarikiwe ibikorwa byo kubaka inzu ye n’uyu mutwe, agasabwa gutanga amafaranga cyanga agahara inzu.

Yagize ati “Nubwo ndi mu ntambara yo guhagarika uyu mutwe w’iterabwoba ariko nawuhaye amafaranga.”

“Nahitishijwemo kwishyura Al-Shabab amafaranga no guhagarikirwa ibikorwa byo kubaka. Gusa nicujije kuba narabishyuye agera ku 3600 by’amadorali ya Amerika kandi n’inzu yanjye yari imaze kuzura.”

Hiraal ivuga ko inzira imwe rukumbi yo kubuza iyi mitwe y’iterabwoba kwinjiza amafaranga muri ubu buryo ari ukunoza umutekano, bityo abagize umuryango w’ubucuruzi ndetse n’abandi bagashobora gukora nta nkomyi ya al-Shabab.

Uyu mutwe umaze imyaka irenga icumi ukora ibikorwa by’iterabwoba kandi ukomeje kugaba ibitero mu turere tugenzurwa na guverinoma, ndetse bigaragara ko wazakomeza gukura amafaranga mu baturage.

Al-Shabab yinjiza imisoro myinshi kurusha iyo ubuyobozi bw'igihugu bubona mu baturage

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .