Seychelles: Umuntu wa mbere yahitanywe na Covid-19

Yanditswe na IGIHE
Kuya 5 Mutarama 2021 saa 09:28
Yasuwe :
0 0

Mu gihe ibihugu bimaze gupfusha abantu benshi bazize icyorezo cya Covid-19, mu birwa bya Seychelles ho nibwo hakiboneka umuntu wa mbere wahitanywe n’iki cyorezo.

Inzego z’ubuzima muri Seychelles zatangaje ko nyakwigendera yari umugabo w’imyaka 57 washyizwe mu bitaro mu ijoro ribanziriza umwaka mushya.

Covid-19 yageze mu birwa bya Seychelles muri Werurwe 2020, kugeza ubu abamaze kuyandura babarirwa muri 322 barimo 223 bayikize.

Zimwe mu mpamvu zafashije ibirwa bya Seychelles kutibasirwa cyane na Covid-19 harimo imiterere y’aho, aho ari ibirwa biri hagati mu Nyanja y’Abahinde bityo hakaba nta rujya n’uruza rw’abantu binjira mu gihugu mu buryo butagenzuwe cyane ko abenshi bakoresha indege.

Mu ijambo Perezida wa Seychelles, Wavel Ramkalawan yagejeje ku baturage yabasabye kwitwararika yemeza ko iki cyorezo kiri gufata indi sura muri ibi birwa.

Ati “Ibintu biri guhinduka buri wese akwiye gufata ibi bintu mu buryo bukomeye.”

Mu rwego rwo gukomeza kwirinda ko iki cyorezo cyarushaho gukwirakwira Seychelles iherutse gufata ingamba zirimo gufunga insengero, utubari, inzu zikorerwamo imyitozo ngororamubiri n’amashuri.

Nubwo Covid-19 ifatwa nk’icyorezo cy’Isi yose kugeza ku wa 3 Mutarama 2021 hari ibihugu bisaga icyenda byari bitaragaragaramo umuntu n’umwe wanduye iki cyorezo, muri ibyo harimo Koreya ya Ruguru, Turkmenistan, Samoa, Kiribati, Federated States of Micronesia, Tonga, Palau, Tuvalu na Nauru.

Kuba Seychelles ari ibirwa biri mu byayifashishe kutibasirwa cyane na Covid-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .