00:00:00 IGIHE NETWORK KN KINYARWANDA EN ENGLISH FR FRANCAIS

RDC yatangaje ingengabihe y’amatora ya Perezida

Yanditswe na IGIHE
Kuya 26 Ugushyingo 2022 saa 07:54
Yasuwe :

Repubulika Iharanira Demokarasi ya Congo, yatangaje ko amatora ya Perezida n’ay’abagize Inteko Ishinga Amategeko ateganyijwe ku wa 20 Ukuboza 2023, mu gihe iki gihugu gifite ibibazo birimo n’iby’umutekano muke uterwa n’imitwe yitwaje intwaro.

Komisiyo y’Amatora yatangaje iyo ngengabihe kuri uyu wa Gatandatu mu muhango wabereye mu Murwa Mukuru w’iki gihugu, i Kinshasa.

Iyi komisiyo yagaragaje imbogamizi nyinshi zirimo izijyanye n’ubwikorezi bw’ibikoresho bizakenera kujyanwa ahantu kure, iby’ubuzima bushingiye ku byorezo bya Ebola na Covid-19 n’umutekano muke watumye abatari bake bava mu byabo bagahunga.

Nubwo bimeze bityo, guverinoma yiyemeje ko iyi ngengabihe izubahirizwa byanze bikunze mu gihugu gituwe n’abagera kuri miliyoni 80.

Biteganyijwe ko ingengo y’imari izakoreshwa mu matora muri RDC izagera kuri miliyoni 600 z’amadolari ya Amerika.

Amatora ya perezida aheruka muri Repubulika Iharanira Demokarasi ya Congo yakereweho imyaka ibiri kugeza abaye mu Ukuboza 2018. Muri ayo matora Perezida Felix Tshisekedi yegukanye intsinzi ahigitse uwamubanjirije, Joseph Kabila.

Abakandida bazahatana muri aya matora bazatangazwa mu Ukwakira umwaka utaha naho urutonde rwa nyuma rutangazwe mu Ugushyingo.

Perezida Tshisekedi biteganyijwe ko azongera kwiyamamaza muri manda ya kabiri hamwe na Martin Fayulu, umwe mu bamurwanya.

Muri iki gihugu manda ebyiri ni zo zemewe ku mukuru w’igihugu nk’uko amategeko kigenderaho abigena.

Perezida Felix Tshisekedi biteganyijwe ko aziyamamaza muri manda ya kabiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .