00:00:00 IGIHE NETWORK KN KINYARWANDA EN ENGLISH FR FRANCAIS

RDC yatahuweho kugura intwaro rwihishwa izita ’ibikoresho by’ubuhinzi’

Yanditswe na Rabbi Malo Umucunguzi
Kuya 26 June 2022 saa 03:48
Yasuwe :

Umuryango w’Abibumbye wagaragaje uburyo Repubulika Iharanira Demokarasi ya Congo yagiye ikoresha amanyanga mu kugura intwaro no kwishyura imyitozo ya gisirikare, ibyita ibikoresha byo kwifashisha mu buhinzi.

Ibi birego bikubiye muri raporo yakozwe n’Impuguke z’Umuryango w’Abibumbye ku bibazo by’umutekano muke muri RDC.

Zabonye amakuru ko kugeza mu ntangiriro za 2022, hari ibigo mpuzamahanga byagiye bigurisha intwaro kuri RDC bigatanga n’imyitozo ya gisirikare, mu buryo bunyuranyije n’amategeko.

Raporo ikomeza iti "Nk’uko byemejwe na Banki nkuru ya Congo n’abajenerali benshi ba FARDC, kubera ibihano igihugu cyafatiwe mu kugura intwaro, nticyashoboraga kugura ibikoresho bya gisirikare ku mugaragaro. Kwishyura izo ntwaro byagaragazwaga nko kwishyura ibikoresho by’ubuhinzi, ibintu byagifashije kugura intwaro rwihishwa n’amanyanga mu nyandiko."

Ibyo ngo byakorwaga bitamenyeshejwe komite yashyizweho n’Akanama k’Umuryango w’Abibumbye gashinzwe umutekano, ngo ikurikirane iyubahirizwa ry’ibihano byafatiwe RDC.

Muri iyo raporo hagaragaramo ikigo cyo muri Belarus, hagati ya 2013-2016 cyashyize mu bikorwa amasezerano ya $18,196,875 cyahawe na Minisiteri y’Ingabo ya RDC, yo gutoza abapilote n’abasirikare mu Ngabo zirwanira mu kirere.

Abo bapilote ngo bitozaga gukoresha indege z’intambara za Yak-52, L-39, Su-25 na AN-26, na kajugujugu za Mi-17 and Mi-24, n’abandi basirikare batozwaga gukanika radiyo z’itumanaho.

Belarus yatangaje ko itamenyesheje ya komite kubera ko ngo imyitozo yabereye muri Belarus, ndetse nta mpuguke zoherejwe muri Congo.

Belspetsvneshtechnica ariko ngo yaje guha abashinzwe kurinda za pariki ibikoresho birimo intwaro, ya komite itamenyeshejwe.

Mu bijyanye n’intwaro, hagati ya 2012 na 2018 Banki Nkuru ya Congo yishyuye ibigo byo mu mahanga bitandukanye ku bufatanye na banki zo mu bindi bihugu.

Ni amafaranga yishyurwaga ku mabwiriza ya Minisiteri y’Imari n’Igenamigambi, nayo yagenderaga ku mabwiriza ya Minisiteri y’Ingabo kuko ari nayo yemezaga ibyishyurwa.

Iyi raporo igaragaza ko abasirikare bakuru bane babajijwe kimwe n’inzego eshatu zifite aho zihuriye n‘imari, bemeje ko ubwo buryo bwatangijwe na General François Olenga, wabaye Umugenzuzi Mukuru wa FARDC (2006-2012), aba Umugaba w’agateganyo w’Ingabo za RDC (2012-2014) n’umujyanama wa perezida mu bya gisirikare (2014-2018).

Ibyo bikorwa ngo byakomeje kugeza mu 2019.

Iri tsinda ry’impuguke rivuga ko rimwe na rimwe inzego z’imari zagiye zanga guha serivisi abantu bagira uruhare mu igura ry’izo ntwaro, mu rwego rwo kwirinda ibindi bibazo bishobora kubaho.

Gusa rivuga ko nta shingiro bifite, kubera ko RDC yari yemerewe guhabwa ibikoresho bya gisirikare n’amahugurwa, ariko komite yashyizweho ikabanza kumenyeshwa, kandi bigakorwa n’igihugu cyenda kubitanga.

Ibyo ngo bigakorwa kugira ngo hakurikiranwe ko ibikoresho bitangwa bigera mu maboko ya Leta, aho kuba mu mitwe yitwaje intwaro cyangwa abandi bashaka guhungabanya umutekano.

Mu ngero z’intwaro zaguzwe, ku wa 3 Nzeri 2018 ikigo Ukroboronservice cya Leta ya Ukraine cyagurishije RDC ibikoresho bya gisirikare kuri $ 1,246,886.00, byoherezwa mu 2019 birimo ibikoresho bisimbura ibindi by’imodoka za gisirikare, imbunda nini n’ibindi.

Ukroboronservice yabwiye iri tsinda ko itagurishije RDC ibyo bikoresho nk’ibikoresho by’ubuhinzi, ariko hagenzuwe amasezerano biza kugaragara ko yari ayo “kugura ibikoresho byo mu buhinzi."

Nanone, hagati ya Ukwakira 2012 na Gashyantare 2015 ikigo Netwest Finance S.A. cyo muri Belize cyishyuwe $ 29,249,379.30 yo kugura ibikoresho bya gisirikare, ariko mu nshuro 12 cyishyuwe, icyenda handikwaga ko harimo kugurwa ibikoresho by’ubuhinzi.

Muri Werurwe 2014, Mosston Engineering Ltd, ikigo cyanditswe muri Seychelles, cyakiriye $2,700,000.00 yoherejwe na Guverinoma ya Congo.

Inyandiko za banki zigaragaza ko hagurwaga ibikoresho by’ubuhinzi, ariko hatanzwe ibikoresho bya gisirikare bigenewe FARDC.

Uku kugura ibikoresho rwihishwa kwakomeje kuzamura amakenga, cyane cyane ku ikoreshwa ry’intwaro ziba zaguzwe muri bene ubu buryo, kuko zishobora no gukoreshwa n’imitwe myinshi yitwaje intwaro ikorera muri RDC.

FARDC ishinjwa amanyanga mu kugura intwaro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .