00:00:00 IGIHE NETWORK KN KINYARWANDA EN ENGLISH FR FRANCAIS

RDC yatabaje EJVM kubera M23, Pasiteri watorokanye abayoboke n’ubushomeri buvuza ubuhuha: Amakuru y’ingenzi mu Karere

Yanditswe na IGIHE
Kuya 26 May 2022 saa 08:00
Yasuwe :

Guverineri wa Kivu y’Amajyaruguru, yasabye ko Urwego ruhuriweho n’ibihugu byo muri ICGLR, rushinzwe gukora iperereza ku bikorwa bya gisirikare (EJVM) riperereza ku mirwano ishyamiranyije ingabo za Leta ya Congo n’inyeshyamba za M23.

Iyi ntambara iri kubera muri teritwari za Nyiragongo na Rutsuru kuva ku wa Mbere nijoro.

Itangazo ryasohowe n’ingazo za leta risaba ko hakorwa iperereza ku nkomoko y’iyi mirwano.

Guverineri wa Kivu y’Amajyaruguru yasabye abaturage gutuza no kuba maso ndetse no kugirira icyizere ingabo z’igihugu.

Hagati aho uduce twinshi kuri uyu wa 25 Gicurasi twari twamaze kwigarurirwa n’inyeshyamba za M23 ndetse urujya n’uruza rw’abantu i Goma- Rutsuru rwari rwahagaze.

Abaturage bo mu duce twa Kanombe, Nyesisi, Kabaya, Rumangabo na Nkokwe bavuye mu byabo nyuma y’aho twigaruriwe na M23 nk’uko Radio Okapi yabitangarijwe.

Muri teritwari ya Nyiragongo uduce twa Kibumba, Buhumba, Kigarama n’utundi byavugwaga ko na two turi mu maboko ya M23. Ni mu gihe ingabo za leta zatangaje ko zafashe intwaro nyinshi n’abasirikare batazwi inkomoko nyuma yo gusubiza inyuma ibitero by’umwanzi.

Leta Zunze Ubumwe za Amerika yabujije abenegihugu bayo kudakorera ingendo mu bice bya Goma.

Repubulika Iharanira Demokarasi ya Congo yasabye ingabo za EJVM gukora iperereza ku bitero M23 yagabye kuri FARDC

Burundi: Ubucuruzi bw’amatungo bwahagaritswe kubera indwara ya ‘Rift Valley Fever’ yibasiye inka, ihene n’intama

U Burundi bwafashe ingamba zigamije gukumira ikwirakwira ry’indwara ya Rift Valley Fever’ yibasiye amatungo arimo inka, intama n’ihene aho kuri ubu hamaze gupfa atari make.

Kugeza mu mpera z’icyumweru gishize byavugwaga ko iyo ndwara imaze kwica inka zigeze ku 100 ndetse ifata intama n’ihene mu duce dutandukanye tw’igihugu uhereye mu Ntara ya Ngozi aho yabonetse bwa mbere.

Mu Ntara ya Bujumbura na ho yarahabonetse byatumye kuri uyu wa Gatatu urujya n’uruza rw’ayo matungo ruhagarikwa hafungwa n’amasoko yose ayo matungo acururizwamo kugeza igihe hazafatirwa imyanzuro mishya.

Aborozi bavuga ko itungo iyo rifashwe n’iyo ndwara ritangira rifite umuriro mwinshi uko ugenda wiyongera rikava amaraso mu nda y’amaganga kugeza ripfuye. Abaturage ntibemerewe kurya itungo ryapfuye muri ubwo buryo ahubwo rigomba guhambwa ndetse nta miti barabasha kubona.

Ni ubwa mbere ngo iyi ndwara ibonetse mu Burundi kandi ntibiramenyekana niba yarinjiye biturutse ku matungo yavuye hanze y’igihugu nk’uko BBC yabitangaje.

Ubushomeri buravuza ubuhuha muri Afurika y’Epfo; 65% mu rubyiruko nta kazi bagira

Imibereho mibi iterwa n’izamuka ry’igipimo cy’ubushomeri mu rubyiruko muri Afurika y’Epfo ikomeje kuvugisha benshi aho kugeza ubu abagera kuri 65% batagira akazi.

Muri iki gihugu ni hamwe mu ho igipimo cy’ubushomeri kiri hejuru cyane ku isi. Urubyiruko rwinshi rufite impamyabumenyi ariko ruraziryamanye.

Umunyamakuru uvuga ko adafite akazi kuva mu 2017 yabwiye BBC ko amaze gushaka akazi inshuro zirenga 120 akaba nta cyizere cy’ahazaza afite.

Urubyiruko ruvuga ko abari mu kazi ka leta muri iki gihe ari abagombye kuba bari mu kiruhuko cy’izabukuru ari byo bituma ruhaguruka rukajya mu mihanda kugaragaza ko ubuzima bushaririye.

Iri bura ry’akazi riri ku gipimo cya 65% mu rubyiruko ruri hagati y’imyaka 14 na 24.Leta ishora amafaranga menshi mu kurwanya ubushomeri ariko ibikorwa byayo ngo agatonyanga mu nyanja.

Urubyiruko rwifuza ko abanyamahanga bari mu gihugu mu buryo butemewe n’amategeko birukanwa kuko babatwara amahirwe make y’ubuzima aboneka mu gihugu.

Ubutegetsi bwo burashaka gushyiraho amategeko agenga abakozi b’abanyamahanga no kubabuza gutangiza ibikorwa biciriritse mu nzego zimwe na zimwe.

Igipimo cy'ubushomeri gikomeje gutumbagira muri Afurika y'Epfo, urubyiruko rwifuza ko abanyamahanga babatwara amahirwe bakwirukanwa

Pasiteri yatorokanye abayoboke bagera kuri 20

Polisi yo mu Karere ka Mitiyana muri Uganda iri guhiga bukware umupasiteri watorokanye abayoboke be kuva mu cyumweru gishize bikaba bitazwi aho baherereye.

Uyu mupasiteri uzwi ku mazina ya Samuel Kalibala, yasabye abayoboke be bagera kuri 20 kuva mu ngo zabo bakagira ahandi berekera kubera ko Imana yamubwiye ko isi igiye kurangira.

Kugeza ubu ntibizwi aho aba bantu baherereye nk’uko inkuru ya Daily Monitor ibivuga.

Umuturage wo mu gace ka Mitiyana yavuze ko umugore we ari mu baburiwe irengero ku wa 17 Gicurasi hamwe n’abana babo batanu.

Mbere yaho gato abo bana ngo bari batangiye kugira imyitwarire irimo kwanga ishuri. Bo na nyina ngo bagiye gusenga ntibasubira mu rugo. Nyuma y’umunsi umwe abategereje akababura yagiye kwa pasiteri wabo atungurwa no gusanga umuryango we na wo utari mu rugo, yihutira kumenyesha poliri iki kibazo.

Ku wa 23 Gicurasi, polisi yatangaje ko imaze guta muri yombi batatu bafatanyije n’uwo mupasiteri kujyana abo bantu ahatazwi.

Igiteye inkeke ni uwitirirwa ubupasiteri bamwe bamuzi n’umuntu usanzwe wakoraga akazi k’umwarimu bakaba bavuga ko yinjiriye mu cyuho cy’uko muri Uganda umuntu wese abyuka akiyita umupasiteri.

Muri Werurwe 2000, abantu 700 bapfiriye mu Karere ka Kanungu nyuma y’aho abayobozi b’idini yabo babafungiranye mu rusengero bakabatwikiramo.

Inzu pasiteri waburiwe irengero n'abo bari kumwe bajyaga bahuriramo bagasenga

Afurika y’Epfo: Inzobere mu buzima zagaragaje ko nta mpamvu y’ikingira rusange rya monkeypox

Inzobere mu byo kurwanya indwara muri Afurika y’Epfo zitangaza ko nta mpamvu igaragara yatuma habaho ibikorwa by’ikingira rusange ry’indwara ya monkeypox kandi ko nta mpungenge ko ubwandu bwakwiyongera nk’uko byagenze kuri Covid-19.

Ku mugabane wa Afurika ntihigeze hagaragara ubwandu bw’iyi ndwara muri minsi ya vuba nubwo yigaragaza cyane mu bihugu bimwe na bimwe by’i Burayi.

Inzego z’ubuzima zitangaz ako ziri maso nyuma y’ahao hagaragaye ubwandu ku bagera kuri 200 mu bihugu 19 birimo Espagne, Israel na Leta Zunze Ubumwe za Amerika kuva mu ntangiriro za Gicurasi uyu mwaka.

Umuyobozi Nshingwabikorwa w’ikigo gishinzwe kurwanya indwara zandura, Adrian Puren, yatangaje ko kuri ubu ikingira rusange rya monkeypox atari ngombwa kuko hakiri byinshi byo gusuzuma ku bigenderwaho kugira ngo indwara yitwe icyorezo.

Abandi bahanga bavuze ko monkeypox itandura ku kigero cyo hejuru nka Covid-19.

Gambia igiye kuburanisha Yahya Jammeh wabaye Perezida w’iki gihugu

Guverinoma ya Gambia yatangaje ko igihe kugeza mu butabera Yahya Jammeh ku byaha by’ubwicanyi, gufata abagore ku ngufu, iyicarubozo n’ibindi ashinjwa ko yakoze mu myaka 20 yamaze ku butegetsi.

Minisiteri y’Ubutabera yabitangaje kuri uyu wa Gatatu nyuma yo kugezwaho raporo na komisiyo yakoze icukumbura ku byaha Jammeh ashinjwa kuva yajya ku butegetsi mu 1994 kugeza mu 2017.

Jammeh kugeza ubu yahungiye muri Gunnée Equatorial, igihugu bidafitanye amasezerano yo guhererekanya imfungwa.

Ku butegetsi bwe ashinjwa ko ubwicanyi, gufata abagore ku ngufu, iyicarubozo, gushimuta abantu n’ibindi bihungabanya uburenganzira bwa muntu byakajije umurego.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .