00:00:00 IGIHE NETWORK KN KINYARWANDA EN ENGLISH FR FRANCAIS

RDC yahamagaje Ambasaderi w’u Budage wamaganye ubwicanyi bukorerwa abavuga Ikinyarwanda

Yanditswe na IGIHE
Kuya 14 Mutarama 2023 saa 09:37
Yasuwe :

Minisitiri w’Intebe wungirije akaba na Minisitiri w’Ububanyi n’Amahanga wa Repubulika Iharanira Demokarasi ya Congo, Christophe Lutundula, yahamagaje Ambasaderi w’u Budage muri iki gihugu, Oliver Schnakenberg, nyuma yo kwamagana ibikorwa by’ubwicanyi bikorerwa abaturage bavuga Ikinyarwanda.

Oliver Schnakenberg yari aherutse kugirana ibiganiro na Azarias Ruberwa wigeze kuba Visi Perezida wa RDC ndetse akaba n’umwe mu Banyamulenge bamaze igihe kinini bamagana ibikorwa bya kinyamaswa bibibasira.

Mu butumwa bwanyujijwe kuri Twitter, Ambasade y’u Budage yavuze ko imvugo zibiba urwango ndetse no guhigwa bukware bikorerwa abavuga Ikinyarwanda muri RDC, bikwiye guhagarara.

Hashize igihe muri Congo habibwa imvugo z’urwango ahanini zibasira abavuga Ikinyarwanda, aho Abanyapolitiki bamwe bakwirakwije mu gihugu ko atari ba kavukire, bakwiriye gusubira aho baturutse, bakabita Abanyarwanda.

Bamwe baribasiwe, baricwa, abafite ibikorwa by’ubucuruzi biratwikwa, kuva ubwo umutwe wa M23 wuburaga imirwano uhanganyemo n’Ingabo za Congo.

Kuri uyu wa Gatanu, Minisitiri Lutundula yagiranye ibiganiro na Ambasaderi w’u Budage hagamijwe gusangira amakuru kuri ibyo bibazo, nk’uko Minisiteri y’Ububanyi n’Amahanga ya RDC yabitangaje.

Lutundula yabwiye Ambasaderi w’u Budage ko abafatanyabikorwa ba RDC bari bakwiye kwigengesera igihe bagaragaza uruhande baherereyemo ku bijyanye n’ibibazo bikomeye cyane cyane iby’intambara iri mu Burasirazuba bw’igihugu.

Lutundula kandi yavuze ko hari igitekerezo cyo gukangurira abafatanyabikorwa bose ba RDC gutanga umusanzu mu gukemura ikibazo cy’umutekano mu Burasirazuba bwa RDC, aho kucyongerera ubukana.

RDC yahamagaje Ambasaderi w’u Budage wamaganye ubwicanyi bukorerwa abavuga Ikinyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .