RDC: Umupfakazi wa Gen Kahimbi wapfuye urw’amayobera yishinganishije kuri Leta

Yanditswe na IGIHE
Kuya 10 Kanama 2020 saa 09:06
Yasuwe :
0 0

Umupfakazi wa Général Delphin Kahimbi wapfuye muri Gashyantare uyu mwaka, yishinganishije kuri Leta kubera kwibasirwa nyuma y’urupfu rw’umugabo we.

Kahimbi wari umuyobozi wungirije ukuriye iperereza rya gisirikare, akaba icyegera cya Joseph Kabila wahoze ayobora Congo, yapfuye mu mpera za Gashyantare 2020. Bwa mbere byavuzwe ko yaba yiyahuye nyuma umuryango we utangaza ko yishwe no guhagarara k’umutima ariko byakomeje gukemangwa.

Leta ya Congo yahise itegeka iperereza ryimbitse ku cyamuhitanye na n’ubu riracyakorwa.

Nkoyi Okale Brenda, umupfakazi wa Kahimbi yahaswe ibibazo mu minsi yakurikiye urupfu rw’umugabo we, abihatwa n’ubugenzacyaha bwa gisirikare. Kuwa Gatanu ushize nabwo yari yasabwe kwitaba abakora iperereza ariko ntiyabasha kujyayo kuko yari arwaye yohereza abamuhagarariye mu mategeko.

Mu biri gutuma yishinganisha, n’uburyo aba hafi bo mu muryango we bakomeje kwibasirwa no guterwa ubwoba nkuko RFI yabitangaje.

Muri Kamena, umwe mu bishywa be yarafunzwe. Mu ntangiriro za Nyakanga umubwirizabutumwa w’umuryango nawe yatawe muri yombi. Mu minsi mike ishize, musaza wa Nkoyi Okale Brenda yapfuye amarabira, umuryangio ukeka ko yaba yararozwe.

Nkoyi Okale Brenda yavuze ko ibyo bintu bikomeje kuba ku muryango we biteye impungenge ku buryo abona nta mutekano bafite. Yasabye Guverinoma kubaba hafi bakarindirwa umutekano.

Nubwo nta kiratangazwa n’abahawe gukora iperereza ku cyahitanye Kahimbi, muri Werurwe 2020 Perezida Félix-Antoine Tshisekedi yavuze ko ku murambo we basanzeho ibigaragaza ko ashobora kuba yaranizwe.

Kahimbi yari umwe mu basirikare bakomeye bahoze ku butegetsi bwa Joseph Kabila

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .