RDC: Tshisekedi yanze ubufatanye bw’ishyaka rye n’irya Kabila, agaragaza ko ashobora gusesa Inteko

Yanditswe na IGIHE
Kuya 6 Ukuboza 2020 saa 10:08
Yasuwe :
0 0

Perezida Félix Tshisekedi kuri iki Cyumweru yatangaje ko agiye gushyiraho umuntu uzamufasha kwiga neza ubufatanye bwiza bw’amashyaka ya politiki bushoboka, buzafasha icyo gihugu gusohoka mu bibazo kirimo, agaragaza ko arambiwe ubufatanye bw’impuzamashyaka ye CASH na FCC ya Joseph Kabila wahoze ayoboye icyo gihugu.

Iri huriro rishya yise “Union sacrée de la Nation”, rigizwe n’abanyapolitiki n’andi mashyaka atandukanye ari mu Nteko ishinga amategeko ngo rigamije gufasha Tshisekedi kubona ubwiganze mu Nteko kurusha FCC ya Kabila bizamufasha kubona amajwi ahagije amufasha gutuma imigambi yemereye abaturage igerwaho nta nkomyi.

Tshisekedi yanavuze ko Inteko Ishinga Amategeko yiganjemo abadepite ba FCC, nikomeza kwitambika imishinga ye igamije gukemura ibibazo biri mu gihugu, azayisesa.

Bibaye nyuma y’iminsi hari ubwumvikane buke hagati y’impuzamashyaka ya Tshisekedi n’iya Kabila yari rifite ubwiganze mu nteko ishinga amategeko, aho byavugwaga ko hari amategeko n’imishinga inteko yanga gutora kubera ko itajyanye n’ibyo ishyaka rya Kabila ryifuza.

Ishyaka rya Kabila naryo rishinja Tshisekedi gufata imyanzuro imwe n’imwe atarigishije inama kandi aribyo bemeranyije Tshisekedi ajya gufata ubutegetsi.

Mu ijambo ryaciye kuri televiziyo y’igihugu kuri iki Cyumweru, nyuma y’ibiganiro amaze iminsi agirana n’amashyaka atavuga rumwe na Leta, Tshisekedi yavuze ko agiye gushyiraho umuntu uzamufasha kwiga neza uburyo bushya bw’imikorere ishoboka yo kwihuza kw’andi mashyaka atari FCC agize inteko , izamworohereza gushyira mu bikorwa ibyo yiyemeje.

Yagize ati “Uwo muntu azaba ashinzwe kwiga uburyo bushya bwakoreshwa buhuriza hamwe abagize Inteko Ishinga amategeko ngo haboneke ubwiganze. Muri iryo huriro rishya niho hazaturuka Guverinoma izajyaho byihuse, igashyira mu bikorwa ibyo nemereye abaturage mu gihe gisigaye.”

Yakomeje “Nakusanyije ibitekerezo bitandukanye, nashimishijwe n’ireme ry’isesengura ry’abavandimwe banjye. Nabonye ko abaturage bacu n’inzobere badashyigikiye kuba imbohe za ruswa. Bose barifuza kubona Congo nshya kandi inshingano mpabwa n’Itegeko Nshinga ni ukuba umurinzi w’igihugu.”

Yavuze ko mu biganiro yagiranye n’abanyapolitiki batandukanye mu minsi ishize, bamugiriye inama yo gusoza ubufatanye impuzamashyaka ye CACH yari ifitanye na FCC ya Joseph Kabila guhera mu 2018.

Tshisekedi kandi yavuze ko Guverinoma yashyizweho ku bufatanye bwa FCC na CACH, nayo itatanze umusaruro yari yitezweho, ari wo wo gushyira mu bikorwa ibyo yasezeranyije abaturage.

Jeune Afrique yatangaje ko abahabwa amahirwe yo kuvamo uzafasha Tshisekedi kwiga uburyo bushya bw’imikoranire n’Inteko harimo Moïse Katumbi cyangwa Jean-Pierre Bemba batavuga rumwe na we cyangwa Senateri Modeste Bahati Lukwebo uva mu ishyaka FCC cyangwa se Visi Perezida wa Sena Sami Badibanga.

Bivugwa ko uburyo bushoboka Tshisekedi ashobora gukoresha ari ukugirana ubufatanye n’andi mashyaka mato mato afite abadepite mu Nteko Ishinga Amategeko, bakaba bagira ubwiganze busumbye ubw’aba Kabila mu Nteko, dore ko ishyaka rye rifite abadepite bagera kuri 50, mu nteko y’abadepite 500.

Inteko Ishinga Amategeko yiganjemo abarwanashyaka ba Kabila yagiye yitambika kenshi ibyemezo bya Tshisekedi. Ibiheruka ni ukwitambika irahira ry’abacamanza bashya yari yashyizeho.

Tshisekedi yavuze ko nibyongera kubaho, azakoresha ububasha ahabwa n’amategeko akayisesa.

Impuzamashyaka FCC nayo yateranye kuri iki Cyumweru, itangaza ko ihangayikishijwe n’uburyo inzego z’umutekano n’abayoboke b’ishyaka UDPS rya Tshisekedi bakomeje kwibasira abadepite baryo.

FCC yamaganye itabwa muri yombi ry’umunyamabanga mukuru w’Inteko Ishinga Amategeko no gushaka kumukoresha mu nyungu za politiki binyuranye n’inshingano ze.

Hashize iminsi Perezida Tshisekedi atangaje ko icyizere ubumwe bwa FCC na CASH byari byitezweho kitagezweho, ahubwo hakomeje kuzamuka ibibazo bikomeye by’umutekano, amahoro n’ibindi.

Yavuze ko atazihanganira ko hagira abandi bakurikira inyungu zabo kurusha iza Congo n’abaturage bayo.

Tshisekedi yavuze ko agiye gushyiraho ihuriro rishya rizamufasha gushyira mu bikorwa ibyo yemereye abaturage, ashimangira ko Inteko nimwitambika azayisesa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .