00:00:00 IGIHE NETWORK KN KINYARWANDA EN ENGLISH FR FRANCAIS

RDC: Tshisekedi arashinjwa kwitambika Katumbi ushaka kwiyamamaza mu matora ya 2023

Yanditswe na Bukuru JC
Kuya 21 Nyakanga 2021 saa 01:04
Yasuwe :
0 0

Uwahoze ari Guverineri w’Intara ya Katanga, Moïse Katumbi, arateganya kwitabira amatora ya Perezida mu 2023, nk’umukandida ariko kugeza ubu hari gukorwa ibishoboka ngo asibirwe amayira nk’uko bitangazwa n’abamushyigikiye.

Bumwe mu buryo bwatangijwe nk’amayeri yo kumuca intege ni umushinga w’itegeko wazamuwe n’uwitwa Noël Tshiani, rigena ko Abanye-Congo bafite ababyeyi bombi bakomoka muri iki gihugu ari bo bonyine bemerewe kujya mu nzego nkuru z’igihugu.

Ni mu gihe se wa Katumbi afite inkomoko mu Bugereki. Uyu mushinga wagejejwe mu nteko ku ya 8 Nyakanga uyu mwaka ariko ukaba ukomeje gukurura impaka aho hari abavuga ko ikigamijwe ari ugukumira Katumbi kuri kandidatire ku mwanya wa Perezida mu 2023.

Abadepite bari ku ruhande rwa Katumbi wahoze ari mu batavuga rumwe n’ubutegetsi muri iki gihugu, batangiye kugaragaza ko batazashyigikira uyu mushinga nuramuka utangiye kuganirwaho mu Nteko.

Inkuru ya Jeune Afrique, ivuga ko ari gushaka amaboko muri Leta Zunze Ubumwe za Amerika mu gihe abamuri inyuma baciye ku rundi ruhande bakajya kuri gakondo ye muri Haut-Katanga.

Katumbi yifuza kwitabira amatora y’Umukuru w’igihugu mu 2023 mu gihe Felix Antoine Tshisekedi uri ku butegetsi muri iki gihe ateganya kuziyamamaza muri manda ya kabiri.

Tshisekedi ashinjwa ko ari kuziba amayira ya Katumbi n’abandi bashaka kuzahatana na we muri aya matora bakabisanisha n’uko Umuyobozi w’urubyiruko rwo mu ishyaka ‘Ensemble pour la République’, Jacky Ndala, rya Katumbi, ku Cyumweru gishize yafashwe agafungwa n’inzego zishinzwe iperereza (ANR) nk’uko byatangajwe n’abarwanashyaka baryo.

Moïse Katumbi arateganya kwitabira amatora ya Perezida mu 2023 nk’umukandida

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .