RDC: Mushiki wa Joseph Kabila yahaswe ibibazo n’urwego rushinzwe abinjira n’abasohoka

Yanditswe na Bukuru JC
Kuya 13 Gashyantare 2020 saa 11:05
Yasuwe :
0 0

Ibinyamakuru byo muri Repubulika Iharanira Demokarasi byatangaje ko tariki 30 Mutarama 2020, mushiki wa Joseph Kabila akaba n’impanga ye, Jaynet Kabila yahaswe ibibazo n’urwego rushinzwe abinjira n’abasohoka muri icyo gihugu.

Bivugwa ko Jaynet Kabila ubu uri mu Nteko Ishinga Amategeko nk’umudepite, yahaswe ibibazo mbere gato yo gufata indege yerekeza muri Afurika y’Epfo ku kibuga mpuzamahanga cya N’Djili.

Amaze guhatwa ibibazo, ngo abakozi b’ikigo cy’abinjira n’abasohoka baramuherekeje bamugeza ku kibuga cy’indege.

Ibinyamakuru byo muri Congo bivuga ko Jaynet yahaswe ibibazo kubera kugendana pasiporo y’abadipolomate ariko ntagaragaze inyandiko yerekana ko agiye mu butumwa mu buryo buzwi n’umukoresha (Leta).

Amakuru yatangajwe na Jeunafrique avuga ko umwe mu bakozi b’icyo kigo bahase ibibazo Jaynet Kabila, ngo yaje guhamagazwa n’inama nkuru ishinzwe umutekano iyobowe na François Beya usanzwe ari umujyanama wa Perezida Félix Tshisekedi mu by’umutekano.

Tariki ya 5 Gashyantare habaye inama y’ihuriro ry’amashyaka ririmo n’ishyaka rya Joseph Kabila, FCC, bagaragaza ko guhatwa ibibazo kwa Jaynet ari ubushotoranyi bwo ku rwego rwo hejuru.

Mu kwezi gushize, abandi bayobozi barimo Emmanuel Ramazani Shadary wo mu ihuriro FCC na Marcellin Cishambo babujijwe kurira indege bagana i Bujumbura kuko pasiporo zabo zakemanzwe.

Jaynet Kabila yahaswe ibibazo ubwo yari agiye muri Afurika y'Epfo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .