00:00:00 IGIHE NETWORK KN KINYARWANDA EN ENGLISH FR FRANCAIS

RDC igiye guhabwa iryinyo rya Lumumba, M23 yakajije umurego, Samia yashimagije inguzanyo - Amakuru avugwa mu karere

Yanditswe na IGIHE
Kuya 25 May 2022 saa 11:26
Yasuwe :

Ku itariki 20 Kamena 2022 ni bwo u Bubiligi buzashyikiriza ubutegetsi bwa Repubulika Iharanira Demokarasi ya Congo iryinyo rya Patrice Emery Lumumba wabaye Minisitiri w’Intebe wa mbere w’iki gihugu.

Lumuba waharaniye ubwigenge bwa RDC yari mu maboko y’Ababiligi, yabaye Minisitiri w’Intebe wa mbere ikimara kubona ubwigenge mu 1960 ariko aza gukorerwa Coup d’etat.

Yishwe ku wa 17 Mutarama 1961 hamwe n’abarinzi be babiri mu Karere ka Katanga bigizwemo uruhare n’umucanshuro wakoreraga Ababiligi.

Bwa mbere u Bubiligi bwagombaga gushyikiriza RDC iryinyo rye ryabitswe na komiseri mu gipolisi cy’u Bubiligi, Gérard Soete, ku wa 21 Kamena 2021 ariko birasubikwa byimurirwa ku wa 17 Mutarama 2022, umunsi hazaba hibukwa ku nshuro ya 61, urupfu rwa Lumumba.

Icyo gikorwa cyasubikanywe n’indi mihango yo kumwibuka yari yateguwe biturutse ku bwiyongere bw’ubwandu bwa Covid-19.

Minisitiri w’Intebe w’u Bubiligi, Alexander De Croo, yatangaje ko kuwa 20 Kamena itsinda riturutse muri RDC ritegerejwe i Bruxelles kwakira iryinyo rya Patrice Lumumba.

Biteganyijwe ko mbere y’imihango nyir’izina, iryinyo rizasubizwa komite nto yateguwe n’umuryango wa Lumumba, nyuma habe igikorwa cyo kuryereka abaturage ba RDC baba i Bruxelles.

M23 yemeje ko yigaruriye ibice byegereye Goma

Abarwanyi ba M23 n’ingabo za FARDC kuri uyu wa Gatatu baramukiye mu mirwano ikaze nyuma y’uko kuri uyu wa Kabiri haraye agahenge mu bice bitandukanye bya Rutshuru no hafi ya Goma.

Imirwano yabaye kuwa Kabiri mu bice byegereye Kibumba muri teritwari ya Nyiragongo mu ntera igera kuri kilometero 20 uvuye i Goma yatumye abaturage benshi bava mu byabo inatera ubwoba abatuye uyu murwa mukuru w’intara ya Kivu ya ruguru.

Mu gihe imirwano yari imaze iminsi ibera muri teritwari ya Rutshuru mu duce twa Shangi, Bikenke, Runyoni, ahari ibirindiro by’umutwe wa M23, imirwano y’ejo yumvikanye muri teritwari ya Nyiragongo hafi cyane ya Goma.

Hari amakuru avuga ko M23 yaba yafashe ibice bitandukanye birimo Kibumba hafi ya Goma ikaba inagenzura umuhanda Goma-Rutshuru-Bunagana.

Hari kandi abaturage benshi bahunze bagera ahitwa Kibati mu majyaruguru ya Goma abandi binjira muri uyu mujyi, mu gihe imirwano yari irimbanyije mbere yo guhosha ku mugoroba.

Ku rundi ruhande ariko abaturage barenga 5000 b’i Bunagana bahunze imirwano bajya muri Uganda, kuri uyu wa Kabiri batahutse basubira mu ngo zabo.

Imirwano ikaba yubuye saa kumi zo mu rukerera bakiryamye, ubu bakaba basubiye muri Uganda.

Umuvugizi w’ingabo muri Kivu ya ruguru, Lieutenant-Colonel Njike Kaike, avuga ko ingabo za leta zikigenzura umuhanda wa Goma - Kibumba - Rutshuru n’inkengero zawo kandi zavanye M23 mu birindiro byayo ku misozi ya Runyoni na Tchanzu muri Rutshuru.

Umuvugizi wa M23, Major Willy Ngoma, yabwiye BBC ko ari bo bagabye ibitero byo kuwa Kabiri, ahakana ibivugwa n’igisirikare cya FARDC ko basubijwe inyuma.

Yavuze ko ubu bafite umuhora wose wa Sabyinyo, Bisoke, Karisimbi na Mikeno, kandi Kibumba iri ku muhora wa Mikeno.

Museveni yashwishurije abaturage

Perezida wa Uganda, Yoweri Kaguta Museveni, yakuriye inzira ku murima abaturage bakomeje gutakamba basaba ko hari icyo leta yakora ku izamuka ry’ibiciro ku masoko n’ihungabana ry’ubukungu.

Museveni yavuze ko guverinoma itazagira icyo ikora mu koroshya uyu mutwaro mu ijambo yagejeje ku gihugu mu ijoro ryo ku cyumweru.

Yavuze ko gushyiraho za nkunganire cyangwa kwigomwa imisoro ku bitumizwa mu mahanga bishobora guhungabanya ubukungu.

Museveni ati "Nkunganire cyangwa gukuraho imisoro y’ibitumizwa mu mahanga ni ubwiyahuzi. Bizahungabanya ubwizigame bw’umuryango, ubw’igihugu bitume tutabasha kwishyura ibitumizwa mu mahanga. Abanyamahanga bo hanze ya Afurika y’Iburasirazuba ntabwo bemera amashilingi nk’uburyo bwo guhahirana".

Yagiriye inama abaturage yo gusimbuza ibikomoka ku ifarini bihenze ibindi biribwa by’imbere mu gihugu nk’ibigori, ibitoki n’imyumbati.

Perezida Samia Suluhu yashimagije inguzanyo za IMF na AfDB

Perezida wa Tanzania, Samia Suluhu Hassan, yashimagije uburyo igihugu cye gikoresha inguzanyo zitandukanye gihabwa, avuga ko zirimo gufasha cyane igihugu guhangana n’ingaruka za Covid-19.

Yabivugiye i Accra muri Ghana mu kiganiro yahuriyemo na Perezida wa Ghana, uwa Mozambique n’uwa Comoros. Samia yavuze ko inguzanyo bahawe n’ikigega mpuzamahanga cy’imari (IMF), Banki Nyafurika Itsura amajyambere (AfDB), zatumye ubukungu bwongera gusubira ku murongo, abanyeshuri biga neza ndetse tugeza amazi meza ku baturage.

Ati "Ku bw’ubufasha bwa AfDB n’abandi batuguriza, bakoze neza. Kubera Covid-19, IMF yaduhaye amafaranga yo kuzahura ubukungu. Ibihugu byinshi byakoresheje ayo mafaranga mu kugura imiti yica udukoko [sanitiser], n’ibindi byari bikenewe mu kurwanya Covid-19, ariko njyewe nabivunjemo kugabanya ubucucike mu mashuri".

Samia yavuze ko bari bafite ubucucike bw’abanyeshuri 110 na 120 mu cyumba cy’ishuri ariko ubu bagabanyutse bagera hagati ya 45 na 50.

Ati "Natekereje kandi ko Covid-19 isobanuye kugira amazi meza. Nafashe amafaranga nyashyira mu gukwirakwiza amazi meza mu bice bitandukanye by’igihugu. Ubwo najyaga ku butegetsi, amazi meza yari ku kigero cya 72 ku ijana ubu bigeze hafi kuri 80 ku ijana, ndizera ko mu 2025 bazaba ari 95 ku ijana mu byaro na 85 ku ijana mu mijyi".

Pasiporo zidakoranye ikoranabuhanga ntizikibarizwa muri Uganda

Uganda ni cyo gihugu cya mbere muri Afurika y’Iburasirazuba cyamaze gusimbuza burundu pasiporo zisanzwe izikoranye ikoranabuhanga zifashishwa nk’iz’Umuryango wa Afurika y’Iburasirazuba, EAC.

Abanya-Uganda badafite pasiporo zikoranye ikoranabuhanga ubu ntibashobora gukoresha ikibuga mpuzamahanga cy’indege cya Entebbe, nyuma y’uko hakuweho imashini zasuzumaga pasiporo zisanzwe.

Muri Werurwe 2016 nibwo abakuru b’ibihugu bya EAC bemeje umwanzuro wo gukuraho pasiporo zari zisanzwe hagakoreshwa iz’ikoranabuhanga.

Umunyamabanga mukuru wa EAC, Peter Mathuki, aherutse gusaba ibihugu binyamuryango kwihutisha guhindura pasiporo zisanzwe bikimukira ku z’ikoranabuhanga.

Urwego rw’Igihugu rushinzwe Abinjira n’Abasohoka mu Rwanda (DGIE) ruherutse gutangaza ko Pasiporo Nyarwanda zisanzwe zizaba zacyuye igihe [ni ukuvuga ko zizaba zitagikoreshwa] guhera tariki 28 Kamena 2022. Ubu abantu basanzwe bafite pasiporo zishaje zitaracyura igihe bashobora gusaba pasiporo ikoranye ikoranabuhanga ya EAC.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .