RDC: Igisirikare cyasabwe kutarangazwa n’imvururu ziri hagati ya Perezida Tshisekedi na Kabila

Yanditswe na Ferdinand Maniraguha
Kuya 13 Ugushyingo 2020 saa 12:30
Yasuwe :
0 0

Ubuyobozi bw’Igisirikare cya Repubulika Iharanira Demokarasi ya Congo bwasabye abasirikare bose kutarangazwa n’umwuka mubi wa politiki uri mu gihugu hagati y’abashyigikiye Perezida Tshisekedi na Joseph Kabila wahoze ku butegetsi.

Uwo mwuka mubi umaze igihe ushingiye ku masezerano atubahirizwa bivugwa ko Kabila yagiranye na Tshisekedi mbere yo kumuha ubutegetsi mu 2019.

Mu Ukwakira 2020, Tshisekedi yatangiye ibiganiro n’abanyapolitiki batavuga rumwe na Leta barimo Jean Perre Bemba, Moïse Katumbi n’abandi, bigamije kubiyegereza mu gihe amatora yo mu 2023 yegereje kandi umwuka hagati y’impuzamashyake ye CASH n’iya Kabila FCC utameze neza.

Mu ntangiriro z’uku kwezi, Kabila yoherereje abahagarariye ibihugu byabo muri RDC batandukanye ibaruwa igamije gusobanura ibibazo bya politiki biri mu gihugu n’uburyo Tshisekedi ari kurenga ku masezerano bagiranye ajya ku butegetsi, kuba atubaha amategeko agamije kwikubira.

Kabila yavuze ko we na Tshisekedi bemeranyije ko mu gihe haba hagiye gufatwa umwanzuro ukomeye, impande zombi zigomba kuganira zikabyemeranyaho, nyamara ngo Tshisekedi n’ihuriro rye bashaka gukora ibintu mu buryo bwabo.

Uruhande rwa Tshisekedi narwo rushinja urwa Kabila kwivanga, dore ko FCC ya Kabila ifite imbaraga mu nzego nyinshi zikomeye. Ifite ubwiganze mu Nteko Ishinga Amategeko ndetse abayoboye imitwe yombi baturuka muri iryo huriro.

FCC ifite ubwiganze mu bucamanza, mu gisirikare no mu nzego z’umutekano ndetse byagaragaye mu mpeshyi ishize ubwo abayoboke ba Tshisekedi bigaragambyaga bagakumirwa nyamara aba Kabila bakwigaragambya bagahabwa rugari.

Muri Guverinoma naho, imyanya ikomeye ifitwe n’abayoboke ba FCC. Uburyo bwose Tshisekedi yagiye akoresha ngo akure mu myanya abambari ba Kabila ashyiremo abe bwagiye bwitambikwa na FCC ifite ubwiganze. Ni nako byagiye bigenda ku myanzuro ikomeye igamije gushyira mu bikorwa ibyo yemereye abaturage.

Kuri uyu wa Kabiri tariki 10 Ugushyingo 2020, Umunyamabanga Mukuru w’ishyaka UDPS rya Tshisekedi rimwe mu yagize ihuriro CACH, Augustin Kabuya yashinje Minisitiri w’Imari José Sele Yalaghuli kwanga gusinya no kurekura imishahara y’abasirikare, agamije kurakaza igisirikare n’inzego z’umutekano ngo zivumbure kuri Tshisekedi.

Kabuya yavuze ku mugaragaro ko Kabila ari gushaka uburyo bwose yagaruka ku butegetsi ariko akabikora mu nzira zihabanye n’amategeko.

Ati “Murashaka kugaruka ku butegetsi ariko ntimushaka kugaragaza uburyo muzabikoramo. Mwakoze ubwicanyi butandukanye n’ibyaha by’ubukungu. Amazina yanyu avugwa kenshi mu bujura bwabereye muri iki gihugu.”

Yakomeje agira ati “Uyu munsi mwifatanyije na Minisitiri w’Imari ngo mufunge imishahara y’abasirikare, abapolisi n’abakozi mugamije kubangisha Perezida.”

Kabuya yavuze ko bazabarwanya mu buryo bwose bushoboka ndetse bamwe bagafata iy’ubuhungiro. Yibukije ko uruhande rwa Kabila bitari kurushobokera gufata ubutegetsi mu 1997 iyo hataba UDPS ngo ifatanye nabo guhirika ubutegetsi bwa Mobutu.

José Sele Yalaghuli yatangaje ko aritabaza ubutabera bugakurikirana Kabuya ku byo yise kumusebya.

Igisirikare cyasabwe kudashukwa n’abanyapolitiki

Umuvugizi w’Igisirikare cya RDC, Général Léon Richard Kasonga, kuri uyu wa Kane yamaganye imvugo z’abanyapolitiki zikomeje gucicikana zigamije gucamo ibice abasirikare.

Ati “Abihishe inyuma y’imvugo zigamije kubiba imyivumbagatanyo mu basirikare bakwiriye kumenya ko ntacyo bazageraho. Abasirikare baba bari ku rugamba n’abari mu birindiro babona imishahara yabo n’ibindi bemererwa n’amategeko.”

Kasong yasabye abasirikare kuba maso, bakarangwa n’ikinyabupfura kandi bagakomeza kubaha Umugaba w’Ikirenga ari we Tshisekedi.

Ati “Abasirikare ntibakwiriye kwemera cyangwa kwinjira muri izo mvururu zihabanye n’inshingano bahawe n’Itegeko Nshinga. Abasirikare batozwa kubahiriza amategeko bahawe n’inzego zibakuriye. Bagomba kubaha inzego zashyizweho zemewe n’amategeko. Niyo ndahiro yacu yo kutagambanira Congo.”

Yasabye abanyapolitiki kutavanga igisirikare mu bibazo byabo, bakubahiriza inzego zashyizweho mu gihe hari ikibazo kireba igisirikare bafite.

Igisirikare cyasabwe gukomeza kubaha Perezida Tshisekedi nk'Umugaba w'Ikirenga w'Ingabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .