00:00:00 IGIHE NETWORK KN KINYARWANDA EN ENGLISH FR FRANCAIS

RDC: Humvikanye amajwi y’abamagana ibiganiro bya Perezida Tshisekedi n’inyeshyamba

Yanditswe na IGIHE
Kuya 23 April 2022 saa 03:33
Yasuwe :

Abanyepolitiki bari ku butegetsi muri Repubulika Iharanira Demokarasi ya Congo kimwe n’abatavuga rumwe n’ubutegetsi, bamaganye ibiganiro hagati ya Perezida Félix Tshisekedi n’abahagarariye imitwe yitwaje intwaro igera ku 10, ikorera mu Burasirazuba bwa RDC.

Martin Fayulu uhagarariye abatavuga rumwe n’ubutegetsi wanatsinzwe mu matora ya Perezida yo mu 2018 yegukanywe na Tshisekedi, yavuze ko ibi biganiro bibangamiye ahazaza ha RDC.

Yagize ati “Ntibyemewe ko twareka Tshisekedi agashyira igihugu mu maboko y’imitwe yitwaje intwaro. Ubushobozi buke bw’abigaruriye ububasha bw’abaturage burimo buragira ingaruka ku hazaza h’igihugu cyacu.”

Noël Tshiani na we wari wiyamamaje ku mwanya w’umukuru w’igihugu na we yavuze ko ibiganiro n’imitwe yitwaje intwaro ishyigikiwe n’ibihugu bituranyi no gushyiraho umutwe wo gutabara ku rwego rw’akarere ugizwe n’ibihugu bishyigikiye iyo mitwe ari ukwica ubusugire bw’iki gihugu.

Umudepite mu Nteko Ishinga Amategeko, Juvenal Munubo, umwe mu bagize komisiyo ishinzwe umutekano yavuze ko adashyigikiye guhura kw’abayobozi mu karere n’imitwe yitwaje intwaro.

Ati “Byaba ari ugusubiramo uburyo bushaje butigeze buganisha ku mahoro.”

Uyu mudepite yirinze kuvuga byinshi ku bijyanye n’umutwe udasanzwe w’ingabo cyangwa ibikorwa by’amahanga muri iki gihugu. Yavuze ko bizwi neza ko ibyo bihugu bifite inyungu muri RDC.

Yavuze ko umuti urambye uri mu kubaka ubushobozi bw’igisirikare cya RDC.

Ihuriro Lamuka iryo Martin Fayulu n’uwahoze ari minisitiri w’Intebe, Adolphe Muzito babereye abayobozi ryagaragaje ko bisa n’ubupfumu kubona igihugu cyanga kuganira n’abanyepolitiki kikaba kigiye kuganira n’imitwe yitwaje intwaro bitanyuze mu Nteko Ishinga Amategeko.

Umwanzuro w’ibiganiro bihuza Perezida Tshisekedi n’imitwe yitwaje intwaro igera ku 10 ikorera mu Ntara za Kivu y’Amajyaruguru, iy’Amajyepfo na Ituri wafashwe n’inama y’abakuru b’ibihugu byo mu karere yabereye muri Kenya.

Abagize iyi nama basabye imitwe yose y’abanyamahanga ikorera muri RDC gushyira intwaro hasi abayigize bagasubira mu bihugu byabo mu maguru mashya.

Umwe muri iyi mitwe ni M23 uherutse kubura imirwano mu Ntara ya Kivu y’Amajyaruguru ushinja leta kutubahiriza amasezerano yashyiriweho umukono muri Kenya mu 2013.

Tshisekedi agiye kwinjira mu biganiro mu gihe ibihe bidasnzwe yatangije kuva mu mezi 11 ashize mu Ntara za Kivu ya Ruguru na Ituri byanenzwe ko bitatanze umusaruro wari witezwe. Kuva ku wa 6 Gicurasi 2021, izi ntara zahawe abayobozi n’abapolisi n’abasirikare basimbura abasivile bari basanzweho.

Martin Fayulu ari mu bamaganye ibiganiro bya Tshisekedi n'imitwe yitwaje intwaro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .