00:00:00 IGIHE NETWORK KN KINYARWANDA EN ENGLISH FR FRANCAIS

RDC: ADF yishe abaturage 161 mu kwezi kumwe

Yanditswe na IGIHE
Kuya 28 June 2022 saa 06:48
Yasuwe :

Depite Jean-Baptiste Kasekwa wo muri Repubulika ya Demokarasi ya Congo, yatangaje ko yabaruye abaturage 161 bishwe n’umutwe wa ADF mu minsi 30 ishize, muri Beni.

Ni umubare w’abasivili uyu mutwe wishe rubi, mu gihe ukomeje kugabwaho ibitero n’Ingabo za Uganda (UPDF) zifatanyije n’iza Congo (FARDC). Byongeye, aka gace kari mu bihe bidasanzwe bimaze igihe kirenga umwaka ariko nta musaruro bitanga.

Depite Kasekwa yatangaje ko hagati ya tari 28 Gicurasi kugeza kuri 27 Kamena 2022, umutwe wa Allied Defense Force (ADF) wagabye ibitero 17 byahitanye abantu benshi, ndetse byangiza ibintu.

Yanditse mu itangazo ati "Mu kwezi kwa 14 kw’ibihe bidasanzwe, nubwo harimo kuba ibitero bihuriweho bya FARDC na UPDF, umutwe bikekwa ko ari uwa ADF wagabye ibitero 17 mu minsi 30 muri teritwari ya Beni, byaguyemo abasivili 161, abagera kuri 29 baburirwa irengero mu gihe inzu nyinshi zatwitswe."

Ikinyamakuru 7SUR7.CD. cyatangaje ko muri iyo nyandiko, uyu mudepite wo ku rwego rw’igihugu avuga ko mu bishwe harimo abantu 37 baguye mu gace ka Beu-Manyama ku wa 28 Gicurasi. Abandi 16 biciwe i Bulongo ku wa 30 Gicurasi.

Kuva ku wa 25 kugeza ku wa 26 Kamena ahitwa Kisima hishwe abantu 16, naho hagati ya tariki 25 na 27 mu duce twa Mamove, Mabuo, Matadi, Cepac na Pasiya hicwa abantu 24, harimo abantu 8 batetswe mu mavuta.

Depite Kasekwa atabaza ubuyobozi bwa Congo, akavuga ko ibice bya Beni, Ituri na Fizi-Uvira bikwiye guhabwa imbaraga nk’izo barimo gushyira mu kurwanya umutwe wa M23 mu bice bya Rutshuru muri Kivu y’Amajyaruguru.

Ni umutwe nyamara wo utajya ugaba ibitero ku baturage, ndetse biheruka kwemezwa na raporo y’Impuguke z’Umuryango w’Abibumbye ku mutekano muke mu Burasirazuba bwa RDC.

Nyamara ngo uwo mutwe ukomeje kuvugwaho cyane no guhabwa umwanya wihariye kubera ko byitwa ko ufashwa n’u Rwanda, mu gihe mu bindi bice bya Beni na Ituri abaturage bakomeje kwicwa, batagira kirengera.

ADF ikomeje kwica abantu benshi muri RDC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .