Ku wa 21 Ukuboza, abarwanyi ba ADF bagabye ibitero mu bice bya Robinet mu Majyaruguru ashyira Uburengerazuba bw’Intara ya Kivu ya Ruguru muri Segiteri yitwa Bapere.

Amakuru avuga ko muri ako gace, abo barwanyi bahiciye abantu batandatu, hanyuma ku wa 22 Ukuboza, bageze mu gace bihana imbibi kitwa Kodjo bahicira abantu 12.

Impfu z’aba bantu ziturutse kuri ibi bitero zemejwe n’uhagarariye Umuyobozi w’Intara muri Bapere, Macaire Sivikunula.

Utwo duce twatewemo ibyo bitero turi mu nkengero y’ahitwa Manguredjipa, hamwe mu hakorerwa ubucukuzi bw’amabuye y’agaciro. Ni hamwe mu ho umutwe wa ADF ukunda kugaba ibitero.

Ku wa 25 Ukuboza, ADF yagabye ibitero mu ntera ya kilometero eshanu kugira ngo ugere aha Manguredjipa mu gace ka Makele wica abaturage batatu.

Umutwe wa ADF ufite inkomoko muri Uganda, ukorana n’indi mitwe igendera ku matwara akomeye y’idini ya Islam. Watangiye gukorera mu Burasirazuba bwa Congo guhera mu myaka ya 1990. Hashize igihe kinini, Ingabo za Uganda zigira uruhare mu bikorwa byo kurwanya uyu mutwe ariko ntabwo urarandurwa.

Umutwe wa ADF ukomeje kuyogoza ibintu mu Burasirazuba bwa Congo, ushyira ubuzima bw'abaturage mu kaga