00:00:00 IGIHE NETWORK KN KINYARWANDA EN ENGLISH FR FRANCAIS

RDC: Abavanywe mu byabo n’intambara baricira isazi mu jisho

Yanditswe na Idukunda Kayihura Emma Sabine
Kuya 28 Ukuboza 2022 saa 07:28
Yasuwe :

Abanye-Congo bake mu bari mu nkambi zitandukanye ziri mu Burasirazuba bwa Repubulika Iharanira Demokarasi ya Congo, nibo babashije kwizihiza Noheli bifashishije ibiribwa bike babitse, abandi bavuga ko nta buryo bwo kuyizihiza bari bafite kuko yabasanganye inzara.

Aba baturage biganjemo abaherutse kuvanwa mu byabo n’intambara imaze iminsi ihuje inyeshyamba za M23 n’ingabo za Leta (FARDC).

Bake mu bari mu nkambi zo mu Majyaruguru ya Goma mu Burasirazuba bwa Congo, nibo babashije kwizihiza Noheli basangira bishimye nk’uko basanzwe bayizihiza.

Ababa muri izo nkambi bari mu buzima bubi kuko badafite icyo kurya n’aho gukinga umusaya, gusa abo wakwita abanyamahirwe barara mu mashuri ndetse no mu nsengero.

Olive Pandezi uri mu nkambi yagize ati “Ntacyo nari kwizihiza kuko nta kintu mfite cyo kurya.’’

Inzara iri muri izo nkambi ifitwe na benshi kuko Justine Muhindo na we avuga ko Noheli batashoboraga kuyizihiza bashonje.

Ati ‘‘Turi kwizihiriza mu bubabare kubera intambara n’inzara.’’

Bivugwa ko nibura abantu 510.000 bamaze kuva mu byabo muri teritwari ya Rutshuru muri Kivu y’Amajyaruguru. Mu bahunze, abagera kuri 233.000 bakambitse mu Majyaruguru ya Goma mu gace ka Nyiragongo.

Umuryango Mpuzamahanga wita ku bana, Save the Children, uvuga ko mu byumweru bibiri gusa abana 973 bari bamaze kwandurira Icyorezo cya Cholera muri ako gace.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .