00:00:00 IGIHE NETWORK KN KINYARWANDA EN ENGLISH FR FRANCAIS

RDC: Abapadiri bafite abana basabwe gusezera babyanga bakirukanwa burundu

Yanditswe na Umwali Zhuri
Kuya 8 April 2022 saa 08:16
Yasuwe :

Inama y’Abepisikopi Gatolika muri Repubulika Iharanira Demokarasi ya Congo (CENCO), yasabye Abapadiri bose babyaye abana kwegura ku mirimo yabo y’Ubusaseridoti.

RFI yanditse ko iyi nyandiko ya paji 19 yabonywe n’itangazamakuru yasinyweho n’Abasenyeri bose bo muri RDC, yibutsa Abapadiri bose ko bategetswe guhora ari imanzi. Isohotse mu gihe habura amezi make ngo Papa Francis asure iki gihugu.

Iyi nyandiko ifite umutwe ugira uti "Ku ishuri rya Yezu. Ubuzima nyabwo bwo kwiha Imana". Abasenyeri bayanditse bavuga ko ubuzima bw’igipadiri budashobora kubangikana n’ubwo kubaka urugo.

Aha niho bahera basaba Abapadiri bafite abana gusaba uburenganzira Papa bwo kuva mu Busaserdoti. Bakomeza bavuga ko mu gihe babyanga Musenyeri ashobora kwifashisha Papa agasaba ko Abapadiri babyaye bafatirwa ibihano bya nyuma ari byo kwirukanwa burundu muri Kiliziya.

CENCO ivuga ko ishaka gushyira ibintu ku mugaragaro kuko usanga abana babyawe n’Abapadiri n’abagore bababyaranye banenwa cyangwa bagafatwa ukundi muri sosiyete.

Ikibazo cy’Abapadiri batatira amasezerano bakabyara gikomeje kongera ubukana muri Kiliziya. Mu mpera z’umwaka ushize Musenyeri Mukuru wa Paris, Musenyeri Michel Aupetit, yasabye imbabazi ahita yegura kubera umubano udasanzwe yari afitanye n’umugore.

Icyo gihe kandi Umunyarwanda Padiri Wenceslas Munyeshyaka yahagaritswe ku kuba Padiri wa Paruwasi ya Brionne mu Bufaransa nyuma y’uko bimenyekanye ko yemeye mu nzego z’ubutegetsi ko ari Se w’umuhungu wavutse mu Ukwakira 2010.

Abasenyeri muri RDC banditse basaba abapadiri babyaye kukivamo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .