00:00:00 IGIHE NETWORK KN KINYARWANDA EN ENGLISH FR FRANCAIS

RDC: Abanyamulenge batewe inkeke n’imikoranire ya FARDC n’Ingabo z’u Burundi

Yanditswe na Akayezu Jean de Dieu
Kuya 5 Mutarama 2023 saa 09:19
Yasuwe :

Abanye-Congo bo bwoko bw’Abanyamulenge batuye mu gace ka Minembwe, bagaragaje ko batewe impungenge n’imikoranire iri hagati y’abasirikare b’u Burundi n’Ingabo za Repubulika Iharanira Demukarasi ya Congo, FARDC.

Biherutse gutangazwa ko izo ngabo zagiyeyo binyuze mu butumwa bw’Umuryango wa Afurika y’Iburasirazuba bwo kujya guhangana n’imitwe yitwaje intwaro mu Burasirazuba bw’icyo gihugu.

Ku rundi ruhande ariko, hari amakuru avuga ko hari ingabo z’u Burundi zirimo gukorana bya hafi n’Ingabo za FARDC binyuze mu yindi mikoranire iri hagati ya leta z’ibihugu byombi.

Umuvugizi wa Sosiye Sivile y’Abanyamulenge ba Minembwe, Ruvuzangoma Rubibi Cadet, kuri uyu wa 5 Mutarama 2023, yavuze ko bakomeje guterwa impungenge n’iyi mikoranire.

Bavuga ko bamenye ko abasirikare b’u Burundi bari muri iki gihugu ku bwumvikane bw’ibihugu by’u Burundi na Repubulika ya Demokarasi ya Kongo, aho bagomba gukorana n’ingabo za Leta ya Congo, na FARDC.

Bakemanga intego nyakuri y’ubu bufatanye kuko inshuro nyinshi ingabo za Leta ya Congo zikorana n’imitwe y’inyeshyamba irimo CODECO, Mai Mai, Nyatura, FDLR, Red Tabara n’indi ihiga bukware Abanyamulenge.

Bagaragaza ko ubwo Gen Chico Tshitambwe wa FARDC na Ramazani Fundi bageraga mu Minembwe, ibintu byasubiye irudubi kugeza n’aho abaturage batuye mu bice bitandukanye n’ibyegereye icyicaro cya Brigade ya 12 batangira guhunga.

Ubu bwoba bwatumye basaba ibisobanuro Leta ya Congo byizeza abaturage ba Minembwe ko batekanye ndetse no kubwirwa impamvu Congo ikorana n’ingabo z’u Burundi.

Sosiyete Sivile ya Minembwe yasabye gusobanurirwa impamvu ingabo z’u Burundi zitaje mu masezerano y’ibihugu by’Umuryango wa Afurika y’Iburasirazuba nk’uko uyu muryango wohereje ingabo zo kugarura amahoro muri Congo.

Kugaragarizwa niba amasezerano y’imikoranire ya FARDC n’ingabo z’u Burundi ari zo FNDB azwi n’abanye-Congo.

Basabye kwerekwa niba koko iyi mikoranire igamije guhashya imitwe yitwaje intwaro muri Congo ndetse n’impamvu bahisemo kuzana izi ngabo muri Minembwe aho kuzijyana mu bice birimo imitwe ya Mai Mai, na FDLR ihohotera abaturage bo mu bwoko bw’abanyamulenge.
Abanyamulenge bakaba bagaragaje ko izi ngabo ahantu zageze ntacyo zakoze ngo zirwanye imitwe yitwaje intwaro, ahubwo Inka z’abanyamulenge zikaba zarasahuwe kandi bagahohoterwa.

Ikindi basabye ni uko abasirikare b’Abarundi bakagombye kubanza kujya guhangana n’imitwe yitwaje intwaro yo mu Burundi irimo Red Tabara na FNL-Nzabampema iri mu yica ikanatoteza Abanyamulenge.

Bavuga ko Guverinoma y’u Burundi ikwiriye kumenya ko irimo gukorana n’abakora ibikorwa bitari byiza cyane cyane ingabo za FARDC zibarizwa muri brigade ya 12 izwi mu bikorwa by’ubwicanyi n’urugomo ku baturage ba Minembwe.

Muri iri tangazo bibukije u Burundi kwitonda kugira ngo batagwa mu mutego w’abafite ingengabitekerezo ya Jenoside, ndetse bakamenya ko abaturage ba Minembwe barushye bihagije ku buryo badakeneye urusaku rw’amasasu.

Hashize igihe abanyamulenge basaba ko ubwicanyi bakorerwa muri RDC buhagarara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .